“თამარ ჟვანიამ უმძიმესი მემკვიდრეობა მიიღო, როგორც საარჩევნო კომისიის შემადგენლობის, ასევე მის მიმართ საზოგადოების უნდობლობის თვალსაზრისით,“ - ამბობს საყვარელიძე „ახალ თაობასთან“, - „მას მერე სამი ურთულესი არჩევნები ჩაატარა ჟვანიამ ისე, რომ არც საზოგადოებაში გაჩენილა კომისიის მიმართ ეჭვი, არც უცხოელ დამკვირვებლებს გამოუთქვამთ შენიშვნები. ეს პოზიტიური ცვლილებები მოხდა მხოლოდ ერთ ადამიანზე, თამარ ჟვანიაზე დაყრდნობით. ცესკოს კვალიფიციური და გამოცდილი პიროვნება ხელმძღვანელობს. მის მიერ გატარებულმა რეფორმებმა და კარგად გააზრებულმა პიარკამპანიამ მოიტანა ეს შედეგი. დამსახურებული, მისალოცი და საამაყოა ჯო სი ბაქსტერის ჯილდო როგორც ქალბატონი თამარისთვის, ასევე, მთელი ქვეყნისათვის. საერთაშორისო აღიარება დროული, ძალზე დროულია, რადგან იგი საარჩევნო კომისიის მიმართ ნდობას ზრდის. ამ ჰიპერპოლიტიზირებულ ადგილობრივ არჩევნებში საარჩევნო კომისიის ავტორიტეტი უაღრესად საჭიროა,” - დასძენს რამაზ საყვარელიძე.
ცნობისათვის: საარჩევნო სისტემების საერთაშორისო ფონდმა (IFES) თამარ ჟვანიას დემოკრატიის განვითარებაში შეტანილი წვლილისთვის ჯო სი ბაქსტერის ჯილდო 2 ოქტომბერს გადასცა.
რამაზ საყვარელიძე ოპოზიციაზეც საუბრობს: „მას გამოარჩევს მაქსიმალური არაადექვატურობა და ადგილობრივი არჩევნების გადაქცევა სახელისუფლო არჩევნებად, რაც საპარლამენტო არჩევნების ფუნქციაა. ეს შეფასება, რა თქმა უნდა, ოპოზიციურ პარტიებს ეხება. ისინი იბრძვიან ხელისფლებისთვის და სურთ თბილისი ამის ბერკეტად აქციონ. მთავარი ინტრიგაა მეორე ტური - თუ მეორე ტური შედგა და მეორე ადგილზე ნაციონალების კანდიდატი ვერ გავიდა, მთელი ოპოზიციური და ნეიტრალური ხმები გადავა მეორე კანდიდატის მხარეს და მას გამარჯვების რეალური შანსი ექნება. თუ მეორე ტურში ნაციონალების კანდიდატი გავიდა, თბილისი მას ხმას არ მისცემს.“