ცნობილია, რომ ფესტივალზე ასევე მოწვეულია ჯგუფი - The Parlotones - როკ ბენდი იოჰანესბურგიდან (სამხრეთ აფრიკა), რომელიც სიყვარულსა და ცხოვრებისეულ მოტივებზე შექმნილ სიმღერებს შეასრულებს. ღონისძიებას მასპინძლობას კი, ენერგიული და ძლიერი როკ ჯგუფები Young Georgian Lolitaz და Loudspeakers გაუწევენ.
ამ ეტაპზე, ქართული როკ ჯგუფით Loudspeakers-ით დავინტერესდით, რომელმაც უზარმაზარი პოპულარობა Tbilisi Altervision მუსიკალური ფესტივალით მოიპოვა. მათი სავიზიტო მუსიკა World in my eyes გახლავთ, რომელმაც თავის დროზე თაყვანისმცემლების დიდი არმია შემატა ჯგუფს.
როგორ მასპინძლობას გაუწევს ღონისძიებას Loudspeakers, ჯგუფის წევრებს (გიორგი ტეცოშვილი, ლევან მამალაძე, სანდრო წიკლაური და ლევან ლაუდაძე) სარეპეტიციო ოთახში ვესტუმრეთ. 
ძველი შენობის მეორე თუ მესამე სართულზე (კარგად ვერ მივხვდი, რადგან საკმაოდ დიდი ლაბირინთის გავლა მოგვიწია) გამოყოფილი ოთახი, იქ არსებული თითოეული დეტალი, როგორიცააა მოძველებული სავარძელი, ოდნავ მბჟუტავი ნათურა, სიძველის სუნი, ჯგუფის ყოველდღიურობას ქმნის.
მართალია, მათ კომფორტული სარეპეტიციო დარბაზი არ აქვთ, მაგრამ აქვთ მთავარი - საინტერესო გარემო, სადაც ის მუსიკა იქმნება, რომელიც მრავალ ადამიანს უყვარს, იზიდავს და საკონცერტო დარბაზებში აერთიანებს.
განსხვავებული ხმის ტემბრი, საოცარი მელოდიები, შემსრულებლების უშუალობა და მათი ბუნებრივი ღიმილი მათი შეყვარების მიზეზს გაძლევთ. ამისთვის, უბრალოდ, უნდა მოუსმინოთ…
„დამოუკიდებლობის დღეს გამართულ კონცერტზე მონაწილეობა და ჩვენი რეპერტუარის შესრულება ჯგუფისთვის ძალიან დიდი პატივია, რადგან ვფიქრობ, რომ საქართველოს ისტორიაში 26 მაისი ერთ-ერთი ყველაზე მნიშვნელოვანი თარიღია. სასიამოვნოა ისიც, რომ შესაძლებლობა გვეძლევა, მსოფლიო დონის მუსიკოს ჯეიმს ბლანტთან ერთად, კონცერტში მივიღოთ მონაწილეობა,“ - ამბობს LOUDspeakers - ის სოლისტი ლევან ლაუდაძე.
- ლევან, 26 მაისს, თქვენი რეპერტუარიდან მაინც რომელ სიმღერებს შეასრულებთ?
- ვინდა რაც შეიძლება მეტი ახალი სიმღერა შევასრულოთ, დარწმუნებული ვარ ჩვენი მსმენელი ჩვენგან მუდმივ სიახლეს ელის, შესაბამისად, დღეს ახალ სიმღერებზეც ვმუშაობთ.
- რა მოლოდინები გაქვთ, ნერვულობთ?
- ზოგადად მიმაჩნია, რომ საკმაოდ კარგი ტრადიცია დაინერგება - 26 მაისს მსოფლიო დონის ვარსკვლავების სტუმრობა ქვეყანაში. ჩვენი მთავარი მიზანი მაინც ის არის, რომ ჯგუფი მსმენელის წინაშე მაქსიმალურად მომზადებული წარდგეს - ახალი რეპერტური, ბევრი ახალი მელოდია, რომელიც ტრადიციულად ჰიტად იქცევა. ამასთან, ჩვენთვის ეს უდიდესი გამოცდილებაა, რადგამ მსოფლიო დონის მუსიკოს ჯეიმს ბლანტთან ერთად ჩვენი რეპერტუარის შესრულების შესაძლებლობა მოგვეცა.
- ლევან, როგორ გგონიათ, თქვენი ჯგუფი რატომ შეირჩა?
- თავიდან უბრალოდ ინფორმაცია გვქონდა,რომ 26 მაისს მიძღვნილ ღონისძიებაზე უნდა მიგვეღო მონაწილეობა, შემდეგ გავიგეთ,რომ კონცერტზე მოწვეული იყო ბრიტანელი პოპ ვარსკვლავი - ჯეიმს ბლანტი. ვფიქრობ, ეს ჩვენთვის სტიმულია, და ერთგვარი წახალისება. ვიმედოვნებთ, რომ ჯეიმს ბლანტს ღირსეულ მაპისნძლობას გავუწევთ.
- რატომ ივსება მუდმივად თქვენს კონცერტზე დარბაზი?
- ალბათ იმას იღებენ, რასაც ელოდებიან და იმედგაცრუებულები რომ არ რჩებიან. ფესტივალები, კონცერტები, ეს კი მუსიკოსებისთვის აუცილებელია. გაზრდის შესაძლებლობას იძლევა.
- 26 მაისამდე თუ გაქვთ კონცერტი დაგეგმილი?
- კი, 10 მარტს გვაქვს სოლო-კონცერტი დიღომში, კინოსტუდია ქართული ფილმის პავილიონში. ვმუშაობთ ახალ სიმღერებზე,რომლებსაც შევასრულებთ 10 მარტს და რა თქმა უნდა, 26 მაისსაც.
- რას პირდებით მსმენელს 26 მაისს, ჯეიმს ბლანტთან დუეტს ხომ არ გეგმავთ?
- ბოლო წლებია საბედნიეროდ, ქართულ ჯგუფებს ეძლევათ იმის შესაძლებლობა,რომ მაშტაბურ კონცერტებზე მიიღონ მნაწილეობა. ჩვენ შანსი გვაქვს ფართო აუდიტორიის წინაშე მსოფლიო დონის ვარსკვლავთან ერთად ვიმღეროთ. ფესტივალის დეტალები კი, ჯერჯერობით, საიდუმლოთ დავტოვოთ.
