„გამოიყენეთ ერთ-ერთი საუკეთესო შესაძლებლობა გრანტის მოსაპოვებლად და მიღებული ცოდნა მოახმარეთ საქართველოს!“ - ინტერვიუ განათლების საერთაშორისო ცენტრის სტიპენდიატთან

ამბები

6 ნოემბერი 16:13

მარიამ საღარაძე განათლების საერთაშორისო ცენტრის კიდევ ერთი სტიპენდიატია.

2016 წელს ცენტრის მიერ გამოცხადებული კონკურსის წარმატებით გავლის შემდეგ ის დიდ ბრიტანეთში გაემგზავრა, სადაც ლონდონის უნივერსიტეტის კურტოს ხელოვნების ინსტიტუტში, სამწლიანი კედლის მხატვრობის კონსერვაციის სამაგისტრო პროგრამაზე განაგრძო სწავლა. 26 წლის მარიამ საღარაძემ შეძლო, იმ რვა სტუდენტს შორის მოხვედრილიყო, რომლებსაც ხსენებულ პროგრამაზე სამ წელიწადში ერთხელ იღებენ. საზღვარგარეთ სწავლა ბევრ სირთულესთანაა დაკავშირებული, თუმცა მარიამმა გამოწვევები დაძლია და დაამტკიცა, რომ შეუძლებელი არაფერია. ამჟამად ის დავით გარეჯის დოდორქის სამონასტრო კომპლექსის დიმიტრი თესალონიკელის სახელობის ეკლესიის მე-13 საუკუნის კედლის მხატვრობის კონსერვაციის პროექტში მონაწილეობს და ცდილობს, საზღვარგარეთ მიღებული ცოდნა სამშობლოს მოახმაროს. მარიამი უცხოეთში სწავლის მსურველებს საკუთარ გამოცდილებას უზიარებს და ურჩევს, აუცილებლად  გამოიყენონ შესაძლებლობა, რომელსაც  განათლების საერთაშორისო ცენტრი სთავაზობთ.


უფრო კონკრეტულად, როგორ გაიარა საქართველოში   კონკურსის ეტაპები, რა სირთულეები გადალახა საზღვარგარეთ სწავლის პერიოდში და რა გეგმები აქვს სამომავლოდ, ამის შესახებ მარიამი თავად გიამბობთ.


- მოგვიყევით საზღვარგარეთ სწავლისა და ცხოვრების გამოცდილებაზე (ცენტრის რომელი პროგრამის გამარჯვებული ხართ, რომელ ქვეყანასა და უმაღლეს სასწავლებელში სწავლობდით და რა სპეციალობაზე)?


- მადლობა დაინტერესებისთვის, მოხარული ვარ, რომ საშუალება მომეცა, საზღვარგარეთ სწავლის გამოცდილება გაგიზიაროთ.


პირველ რიგში, მინდა, კიდევ ერთხელ გამოვიყენო შესაძლებლობა და უღრმესი მადლობა გადავუხადო განათლების საერთაშორისო ცენტრსა და The Frank Jackson Foundation-ს სწავლისა და საცხოვრებელი ხარჯების სრული დაფინანსებისთვის; რომ არა მათი თანადგომა, ვერასოდეს შევძლებდი კედლის მხატვრობის კონსერვაციის ერთ-ერთ მსოფლიოში წამყვან საგანმანათლებლო კვლევით ცენტრში სწავლას.


2016 წელს განათლების საერთაშორისო ცენტრმა კონსერვაცია-რესტავრაციისა და ხელოვნების სამაგისტრო პროგრამა ერთ-ერთ პრიორიტეტულ მიმართულებად გამოაცხადა. კონკურსის გავლის შემდეგ გავხდი მათი ბენეფიციარი და გავემგზავრე დიდ ბრიტანეთში, ლონდონის უნივერსიტეტის კურტოს ხელოვნების ინსტიტუტში, სამწლიანი კედლის მხატვრობის კონსერვაციის სამაგისტრო პროგრამაზე.


აღსანიშნავია, რომ ამ პროგრამაზე მთელი მსოფლიოდან მხოლოდ რვა სტუდენტს იღებენ. ამასთანავე, მიღება მხოლოდ 3 წელიწადში ერთხელ ხდება, რაც პროგრამაზე მოხვედრის მნიშვნელობას უდავოდ ზრდის და პრესტიჟს მატებს იმ ქვეყანას, რომლის მოქალაქეც კურტოს კედლის მხატვრობის პროგრამაში ერთვება.


აღნიშნული ინსტიტუტი მსოფლიოში ამკვიდრებს კომპლექსურ მეცნიერულ კვლევაზე დაფუძნებულ კონსერვაციის პრინციპებს. მისი კურსდამთავრებულები, ტრადიციულად, წამყვან პოზიციებს იკავებენ საერთაშორისო ორგანიზაციებში, ამა თუ იმ ქვეყნის ძეგლთადაცვით სტრუქტურებში და წარმატებული პრაქტიკოსი კონსერვატორ/რესტავრატორები არიან. ეს განპირობებულია დატვირთული გრაფიკითა და რთული სასწავლო მასალით. პროგრამის კურსი თეორიული და პრაქტიკული სწავლების ერთობლიობას გულისხმობს და, საბუნებისმეტყველო მეცნიერებებთან ერთად, ხელოვნებისა და კონსერვაციის ისტორიას მოიცავს. პროგრამა ორიენტირებული იყო სამეცნიერო კვლევების განხორციელებაზე, მხატვრობის ტექნოლოგიისა და დაზიანებათა შესწავლაზე, გარემოპირობების კვლევასა და მონიტორინგზე, რომელიც მოიცავდა მაღალტექნოლოგიური ლაბორატორიისა და პორტატული ინსტრუმენტების გამოყენებას, მათგან აღებული ინფორმაციის ანალიზსა და ინტერპრეტაციას.


ყოველწლიურად 7-კვირიანი ექსპედიციები გვქონდა სხვადასხვა ქვეყანაში. მაგალითად, პირველ წელს გავემგზავრეთ აზიის ერთ-ერთ უნიკალურ ქვეყანაში, ბუტანში, ტანგოს სამონასტრო კომპლექსის მეჩვიდმეტე საუკუნის კედლის მხატვრობის გადაუდებელი საკონსერვაციო სამუშაოების ჩასატარებლად და დეტალური დიაგნოსტიკური დოკუმენტაციის შესაქმნელად.  


მეორე წელს ვეწვიეთ ინდოეთს, რაჯასტანის შტატში არსებულ ნაგორის სასახლეთა კომპლექსს. აბა მაჰალის სასახლეს ჩავუტარეთ ტექნოლოგიური და დიაგნოსტიკური კვლევა, ასევე, გადაუდებელი საკონსერვაციო სამუშაოები, შევქმენით გარემოს მონიტორინგის სტრატეგია და მოვახდინეთ ამის იმპლემენტაცია.


მესამე წელი დაეთმო ორ შვიდკვირიან ექსპედიციას. ერთი, კვლავ ინდოეთში, ნაგორის კომპლექსში არსებული  ჰადი რანი მაჰალის სასახლის კონსერვაციას ეძღვნებოდა, ხოლო მეორე ექსპედიცია ინგლისში, პიტერბოროუსთან ახლოს მდებარე ლონგთორპის კოშკის მეცამეტე საუკუნის მხატვრობის კონსერვაციას შეეხო. აღსანიშნავია, რომ მოხსენიებული პროექტები საერთაშორისო მნიშვნელობისაა და ხელმძღვანელებად მსოფლიოში წამყვანი კონსერვატორები გვყავდნენ, რომლებთან მუშაობის გამოცდილებაც მსოფლიოში მხოლოდ ათობით ადამიანს აქვს. ფინალური წელი სამაგისტრო ნაშრომით სრულდება. ჩემი თემა ეხებოდა საქართველოში კედლის მხატვრობის კონსერვაციის ისტორიას, მის კრიტიკულ ანალიზსა და რეკომენდაციებს კონსერვაციის მიდგომებთან დაკავშირებით. ასევე, ვიმუშავე საქართველოში კედლის მხატვრობის მქონე რესტავრირებული ძეგლების ელექტრონული ბაზების შექმნაზე.


მიუხედავად იმისა, რომ ლონდონში სწავლის პერიოდი საკმაოდ დატვირთული იყო, მაინც ვახერხებდი ქალაქში ცხოვრებით სიამოვნების მიღებას. კულტურული შოკიდან გამოსვლის შემდეგ, იაზრებ, რომ ინტერნაციონალური გარემო გეხმარება უცხოობის შეგრძნების დაძლევაში. ქალაქის არქიტექტურა, უმდიდრესი მუზეუმები, საოცარი პარკები არ გაძლევს მოწყენის საშუალებას. გაქვს შესაძლებლობა, გასინჯო მსოფლიოს ნებისმიერი კუთხის სამზარეულო, დაესწრო უამრავ წარმოდგენას, შეუერთდე სხვადასხვა სპორტულ თუ გასართობ წრეს.


რა თქმა უნდა, ლონდონსაც აქვს გარკვეული ნაკლი.  სტუდენტისთვის საკმაოდ რთულია საცხოვრებლის მოძებნა. მაღალი ფასები არა მხოლოდ ბინებსა და კვების პროდუქტებზეა, არამედ ტრანსპორტზეც. არსებობს უსაფრთხოებასთან დაკავშირებული საკითხებიც, უცხო ქვეყნიდან ჩასული სტუდენტი აუცილებელია წინასწარ გაეცნოს, მაგალითად, საცხოვრებელ უბანს, იქაურ მობინადრეებს, რათა თავიდან აიცილოს გარკვეული პრობლემები.


- გაიხსენეთ ის ეტაპები, რომლებიც სტიპენდიის მოპოვებამდე გაიარეთ. რამდენად რთული იყო ცენტრის კონკურსში გამარჯვება? და რამდენად მარტივი და გამჭვირვალე - ცენტრის სასტიპენდიო კონკურსის ეტაპები?


მოგეხსენებათ, დიდი ბრიტანეთი, მით უფრო ლონდონი, მსოფლიოში ერთ-ერთი ძვირად ღირებული ქალაქია, ლონდონში სწავლისა და საცხოვრებელი ხარჯების დაფარვა საქართველოს რიგითი მოქალაქისთვის წარმოუდგენელია. შესაბამისად, ერთადერთი გამოსავალი სწავლის უნიკალური შანსის გამოსაყენებლად დაფინანსების მოძიება იყო. ძიების პროცესში შევიტყვე განათლების საერთაშორისო ცენტრის მიერ გამოცხადებული კონსერვაცია-რესტავრაციის, ხელოვნების საერთაშორისო სამაგისტრო პროგრამის შესახებ. დასაფასებელია, როდესაც სახელმწიფო იაზრებს კულტურული მემკვიდრეობის მნიშვნელობას და მისი შენარჩუნების აუცილებლობას. ინვესტიცია იდება ევროპული დონის განათლების მიღებაში, რათა მოხდეს ხელოვნების, ზოგადად, კულტურისა და ტრადიციის სწორი გზით შენარჩუნება.


პირად გამოცდილებაზე დაყრდნობით შემიძლია, თამამად ვთქვა, რომ ცენტრის შეფასების სისტემა ლოგიკური, გამართული და ობიექტურია. კონკურსი მოიცავს ორ ეტაპს. პირველი ეტაპი საბუთების შემოწმებას ეთმობა, ხოლო მეორე ეტაპი კომისიის წევრებთან გასაუბრებაა. წევრები ორიენტირებულნი იყვნენ აპლიკანტის შესაძლებლობების მაქსიმალურ გამოვლინებაზე, რაც დაძაბულობას ხსნიდა და სტუდენტებს თავდაჯერებულობას მატებდა.


სიმართლე ვთქვა, ვშიშობდი, რომ პროგრამის ხანგრძლივობა (სამწლიანი სამაგისტრო პროგრამა) და მოთხოვნილი სწავლის საფასური შეაფერხებდა გრანტის მოპოვებას. საბედნიეროდ, განათლების საერთაშორისო ცენტრმა, გამომდინარე იქიდან, რომ შეტანილმა აპლიკაციამ და გასაუბრებამ დააკმაყოფილა მოთხოვნილი კრიტერიუმები, მთლიანად დამიფინანსა სწავლის გადასახადი, რისთვისაც დიდ მადლობას ვუხდი. აქვე ვიტყვი, ამ გადაწყვეტილებას ისიც ამყარებდა, რომ ჩემს სწავლასა და ცხოვრებაში ინვესტიციას არა მხოლოდ ქართული, არამედ ბრიტანული მხარეც, The Frank Jackson Foundation-იც, დებდა.


დავამატებ, რომ სტუდენტებს, რომლებიც, ჩემსავით, ერთზე მეტწლიანი პროგრამებით არიან წასულები, უწევთ ყოველწლიურად ცენტრისთვის ნიშნების ფურცლის წარდგენა. ამერიკული სისტემით, წლიური საშუალო შეფასება არაუმცირეს B უნდა იყოს, რათა სტუდენტმა შემდეგი წლის დაფინანსების მოპოვება შეძლოს. ერთი მხრივ, მაღალი შეფასების აუცილებლობა სტუდენტს გარკვეულ სტრესს უქმნის, თუმცა, ეს მიდგომა გამართლებულია, ვინაიდან სახელმწიფო დებს დიდ ინვესტიციას და ითხოვს მაღალკვალიფიციური კადრის გაზრდას, რისი ერთ-ერთი გამომხატველი ნიშანიც შეფასების ფურცელია.  


- რა იყო მთავარი სირთულე, რომელიც საზღვარგარეთ სწავლის პროცესში გახსენდებათ?


ჩემი პირველი სირთულე უცხო ენაზე სწავლასა და ბრიტანულ განათლების სისტემაზე მორგებას უკავშირდება. დროთა განმავლობაში ინტენსიურმა მეცადინეობამ და უცხოელ კოლეგებთან მუდმივმა კონტაქტმა გამიადვილა ლონდონში ცხოვრება და სწავლა. აღსანიშნავია, რომ მყავდა ძალიან ძლიერი რვაკაციანი ინტერნაციონალური ჯგუფი. ზოგიერთ მათგანს ამერიკაში - კოლუმბიის უნივერსიტეტი, ნიდერლანდებში - ამსტერდამის უნივერსიტეტი, ინგლისში ოქსფორდის უნივერსიტეტის ქიმიის სადოქტორო ჰქონდა დამთავრებული. ეს ფაქტი ცოტა მაშინებდა, თუმცა, ვფიქრობ, შეუძლებელი არაფერია, თბილისის სახელმწიფო სამხატვრო  აკადემიის საბაზისო ცოდნის წყალობითა და ინტენსიური მუშაობით შესაძლებელია გარკვეული გამოწვევების დაძლევა და შენი ქვეყნის წარმოჩენა.


- ყველაზე სასიამოვნოდ რა გახსენდებათ?


ჩემი სასწავლო პროგრამის სპეციფიკიდან გამომდინარე, მოგზაურობა და მუშაობა  გვიწევდა ისეთ ქვეყნებში, როგორებიცაა ინდოეთი, ბუტანი, ნეპალი, ინგლისი. ჩემზე საკმაოდ დიდი გავლენა იქონია აქამდე უცნობ კულტურებთან, მათ ტრადიციებსა და უნიკალურ ხელოვნებასთან ზიარებამ. სასიამოვნოდ მახსენდება ბუტანის თვალწარმტაცი და მრავალფეროვანი ბუნება. მასთან შერწყმული მრავალსაუკუნოვანი ბუდისტური მონასტრები. ჩემზე დიდი შთაბეჭდილება მოახდინა ტრადიციულ სამოსში გამოწყობილმა ინდოელმა ხალხმა, რომელთა მუდამ მომღიმარი სახეები ნახევრად დაფარული იყო მბზინვარე მოსასხამებით.  


ამ სამ წელიწადში შევიძინე არაჩვეულებრივი მეგობრები, როგორც უკვე აღვნიშნე, ჯგუფში მხოლოდ რვა ადამიანი ვიყავით, შესაბამისად, ამ ხნის განმავლობაში ერთი დიდი ოჯახი გავხდით. მათთან ყოველდღიური ურთერთობა ძალიან მაკლია, თუმცა დისტანციურად კვლავ ვინარჩუნებთ როგორც მეგობრულ, ისე პროფესიონალურ კავშირს. ბედნიერი ვარ, რომ საშუალება მომეცა, კედლის მხატვრობის კონსერვაციის სფეროს ერთ-ერთი უმნიშვნელოვანესი წარმომადგენლის შერონ კათერის სტუდენტი ვყოფილიყავი. მასთან გატარებულმა წლებმა ჩემს პროფესიულ ზრდასა და სამომავლო გეგმებზე უდავოდ დიდი როლი ითამაშა.


- სად მუშაობთ ამჟამად, როგორ გაგრძელდა თქვენი კარიერა სწავლის დასრულების შემდგომ?


ამჟამად ჩართული ვარ დავით გარეჯის დოდორქის სამონასტრო კომპლექსის დიმიტრი თესალონიკელის სახელობის ეკლესიის მე-13 საუკუნის კედლის მხატვრობის კონსერვაციის პროექტში. მხატვრობა უნიკალურია, როგორც მოხატულობის პროგრამითა და იკონოგრაფიით, ისე ტექნოლოგიით. გაჯის შელესილობაზე შესრულებული საკმაოდ მძიმე დაზიანებების მქონე მხატვრობა 2015 წელს აღმოჩნდა და მისი სარესტავრაციო პროცესი ამჟამად მიმდინარეობს.


- რა გავლენა იქონია განათლების საერთაშორისო ცენტრის სტიპენდიატობამ თქვენს დასაქმებაზე?


რამდენიმე დღის წინ საქართველოს პრემიერ-მინისტრი, ბატონი გიორგი გახარია და მისი აპარატის თანამშრომლები შეხვდნენ განათლების საერთაშორისო ცენტრის კურსდამთავრებულებს. შეხვედრაზე ნათლად გამოჩნდა, რომ სახელმწიფო აპარატის დიდი სურვილია, გაუმჯობესდეს საჯარო სტრუქტურები. როგორც აღინიშნა, მათ გაძლიერებაზე გარკვეული პასუხისმგებლობა განათლების საერთაშორისო ცენტრის კურსდამთავრებულებსაც ეკისრებათ. მე, როგორც განათლების საერთაშორისო ცენტრის ერთ-ერთი კურსდამთავრებული, მოხარული ვიქნები, თუკი საშუალება მომეცემა, მცირედი წვლილი შევიტანო ქართული საკონსერვაციო სფეროს განვითარებაში.


- რა რჩევას მისცემდით განათლების საერთაშორისო ცენტრის ახლანდელ და მომავალ სტიპენდიატებს, მათ, ვინც საზღვარგარეთ ახლა დაიწყეს სწავლა ან სამომავლოდ აპირებენ სწავლის გაგრძელებას?


ვფიქრობ, განათლების საერთაშორისო ცენტრის პროგრამა ერთ-ერთი საუკეთესო შესაძლებლობაა გრანტის მოსაპოვებლად. ყველას ვურჩევ, შეიტანოს განაცხადი და მიღებული ცოდნა საქართველოს მოახმაროს! გარდა ამისა, მინდა აღვნიშნო, რომ არსებობს განათლების საერთაშორისო ცენტრის კურსდამთავრებულების ასოციაცია, რომელში გაწევრიანებაც შეუძლიათ საქართველოში დაბრუნებულ ბენეფიციარებს. მათ საშუალება ეძლევათ, მონაწილეობა მიიღონ ასოციაციის მიერ გამოცხადებულ მცირე საგრანტო პროექტებში, რათა დაფინანსება მოიპოვონ და მსოფლიოს წამყვან უნივერსიტეტებში მიღებული ცოდნისა და გამოცდილების ქართულ სივრცეში რეალიზება მოახდინონ. ვფიქრობ, ეს შესაძლებლობა დამატებით სტიმულს აძლევს კურსდამთავრებულებს, თავიანთი შესაძლებლობები მოსინჯონ კვლევით-საგანმანათლებლო სფეროში.


- როგორია თქვენი სამომავლო გეგმები?


მინდა, მაქსიმალურად ჩავერთო საქართველოში კედლის მხატვრობის კონსერვაციის სფეროს საგანმანათლებლო და კვლევით ასპექტებში. ასევე, პროფესიული ზრდისთვის აუცილებელია საერთაშორისო საკონსერვაციო პროექტებში მონაწილეობა, შესაბამისად, ვცდილობ მსოფლიო მასშტაბით დამყარებული კავშირების მაქსიმალურად გამოყენებას. ასევე, დიდი სურვილი მაქვს აკადემიური ხარისხის გაღრმავების, ვფიქრობ საზღვარგარეთ დოქტორანტურის პროგრამით განათლების მიღებაზე.

დღის ჰოროსკოპი

6 დეკემბრის ასტროლოგიური პროგნოზი

რას გვირჩევენ ვარსკვლავები 6 დეკემბრისთვის ჯანმრთელობის, ბიზნესის და სიყვარულის მიმართულებით?
იცით თუ არა...

რას ნიშნავს ასო „V“ თქვენს ხელისგულზე?!

ხელისგულზე დააკვირდით გულის ხაზს. იგი იწყება ნეკა თთის ძირიდან, მიუყვება მთელს ხელისგულს და მთავრდება შუა და საჩვენებელ თითებს შორის. თუკი ეს ხაზი შუა ნაწილიდან ორად იყოფა, ესე იგი, თქვენ ნანატრი „V“ ასოს ბედნიერი მფლობელი ხართ!
ამბები

ადამიანის ხუთი გრძნობა ცხოვრების ხელოვნების აღმოსაჩენად

წლევანდელი TEDxTbilisi-ის მთავარი თემა „ცხოვრების ხელოვნებაა“.
კულინარია

საახალწლო ლაბა ქათმის ხორცით - ძალიან გემრიელი და ნოყიერი

ქათმის ლაბას ძალიან ადვილად მოამზადებთ, თანაც საახალწლო სუფრასაც უდავოდ დაგიმშვენებთ.
დღის ჰოროსკოპი

5 დეკემბრის ასტროლოგიური პროგნოზი

რას გვირჩევენ ვარსკვლავები 5 დეკემბრისთვის ჯანმრთელობის, ბიზნესისა და სიყვარულის მიმართულებით?
ამბები

გიორგის სიცოცხლისთვის!

პატარა გიორგის საზოგადოების დახმარება სჭირდება!
ამბები

„ვისოლ ჯგუფმა“ სტუდენტური დასაქმების ფორუმი გამართა  

„ვისოლ ჯგუფმა“ „ფაბრიკაში“ სტუდენტებისთვის დასაქმების ფორუმი გამართა. 
ამბები

„ჯიპიაი ჰოლდინგი“ ჰოსპიტალური ბიზნესიდან გადის

„ჯიპიაი ჰოლდინგი“, ევროპელი აქციონერების გადაწყვეტილებით, სადაზღვევო ბიზნესსა და მასთან დაკავშირებულ საქმიანობაზე მოახდენს ფოკუსირებას. შვილობილი „ჯეო ჰოსპიტალსის“ კლინიკების ქსელი შპს „ქართულ ჰოსპიტალთა ჯგუფმა“ შეიძინა.
დღის ჰოროსკოპი

4 დეკემბრის ასტროლოგიური პროგნოზი

რას გვირჩევენ ვარსკვლავები 4 დეკემბრისთვის ჯანმრთელობის, ბიზნესისა და სიყვარულის მიმართულებით?
იცით თუ არა...

1992 წლის 3 დეკემბერს მსოფლიოში პირველი SMS გაიგზავნა!

მართალია, გამოგონებათა უმრავლესობა, რომლებმაც სამყარო შეცვალა, აშშ-ში შეიქმნა, თუმცა sms - Short Message Service სრულად ევროპული მიღწევაა... 
თემატური ჰოროსკოპი

რას მოასწავებს 2020 წლის სიმბოლო - თეთრი მეტალის ვირთხა?

2020 წელი, აღმოსავლური კალენდრის მიხედვით, ვირთხის წელიწადია. ჩინური ჰოროსკოპის კალენდარში ვირთხა პირველია 12 ცხოველს შორის, რომლებიც ერთმანეთს გარკვეული თანმიმდევრობით ცვლიან. 
დღის ჰოროსკოპი

3 დეკემბრის ასტროლოგიური პროგნოზი

რას გვირჩევენ ვარსკვლავები 3 დეკემბრისთვის ჯანმრთელობის, ბიზნესისა და სიყვარულის მიმართულებით?