ქეთი ჩხაიძე, 10 წლის
წელს მეექვსე კლასში გადავედი. მომენატრა სკოლა, განსაკუთებით მეგობრები. ვგეგმავ, წარმატებით დავიწყო და დავასრულო მეექსვე კლასი. ყველა საგანს ერთნაირად ვსწავლობ, მაგრამ ყველაზე მეტად მათემატიკა მაინტერესებს. სასწავლო წლის პირველი დღე ალბათ, უფრო, ემოციური იქნება. მეგობრებთან შეხვედრა, საზაფხულო არდადაგების და შთაბეჭდილებების ერთმანეთისთვის გაზიარება. დარწმუნებული ვარ, ბევრს ვიხალისებთ. ყველა ძალიან მომენატრა.
საბა ჯიქია, 8 წლის
სკოლის დაწყება მიხარია. სიმართლე გითხრათ, სკოლაზე მეტად, კლასელები მომენატრნენ. ჩემი ყველაზე საყვარელი საგანია ბუნება, მომწონს საინტერესო მოვლენები. ჩემი აზრით, სწავლის დაწყების პირველივე დღე დატვირთული არ იქნება. ალბათ, კლასელები ერთმანეთს მოვიკითხავთ, ვიხალისებთ, მოვყვებით ვინ, სად და როგორ დავისვენეთ.
ნუცა სანაია, 10 წლის
არ მგონია სწავლის დაწყების პირველი დღე ძალიან გამორჩეული იყოს. უბრალოდ, მეგობრები შევხვდებით ერთმანეთს და მასწავლებლები დავალებებს არ მოგვცემენ. სკოლაც ძალიან მომენატრა, მასწავლებლებიც და ჩემი კლასელებიც. ყველაზე მეტად მიყვარს მათემატიკა და ინგლისური ენა. ვფიქრობ, ახალ სასწავლო წელს წარმატებით დავიწყებ და დავასრულებ კიდეც.
ანასტასია (ბარბარე) ეზიეშვილი - 8 წლის
სკოლის დაწყების დღეს მოუთმენლად ველოდები. ყველაზე მეტად კი - მეგობრებთან და მასწავლებლებთან შეხვედრას. კარგი იქნება, თუკი კლასელები ერთად სადმე პიკნიკზე წავალთ და ერთმანეთს ზაფხულის არდადაგების ამბებს გავუზიარებთ. დარწმუნებული ვარ, სწავლის დაწყების პირველი დღე ძალიან ხალისიანი იქნება. ყოველთვის მინდოდა, სწავლა ჩემ დაბადების დღეზე დაწყებულიყო და მთელი კლასი დამეპატიჟა, მაგრამ დაბადების დღე 17 დეკემბერს მაქვს და ამიტომ, არ გამოდის. საერთოდ, ვფიქრობ, რომ საზაფხულო არდადაგები ძალიან დიდხანს გრძელდება და მე რომ განათლების მინისტრი ვიყო, დასვენებას შევამცირებდი. მინდა, რომ სკოლაში მეგობრებთან ერთად უფრო მეტი დრო გავატარო.
სალომე სანაია - 11 წლის
სკოლაც მომენატრა და მეგობრებიც. ყველაზე მეტად ამ დღეს მეგობრების ნახვა გამახარებს. სწავლის დაწყების დღე ჩვეულებრივად წარმომიდგენია. მეგობრები შევხვდებით ერთმანეთს და გავუზიარებთ ზაფხულის თავგადასავლებს. სკოლაში სიარული მიყვარს, მაგრამ კარგი იქნება, დავალებების სახლში მომზადება არ იყოს საჭირო, იქვე, სკოლაში რომ ვაკეთებდეთ. ასევე კარგი იქნება, სწავლა ცოტა გვიან რომ დაიწყოს, 11 ან 12 საათზე. გაკვეთილებს შორის დასვენების დრო ნორმალურია, მაგრამ ზაფხულის არდადაგებს ცოტას შევამცირებდი. აი, აგვისტოში რომ დაიწყოს სწავლა, წინააღმდეგი არ ვარ.