ლალი ტოტიკაშვილი: საკმაოდ ლმობიერი დედა ვარ, თუმცა ზღვარს ყოველთვის ვიცავ.

- ლალი, რა ასაკში გახდით დედა და რას ნიშნავს ეს თქვენთვის? 
- დედა საკმაოდ გონიერ - 27 წლის ასაკში გავხდი. დედობა ჩემთვის ყველაზე ძვირფასი გრძნობაა, ყოველივე ამის სიტყვებით გადმოცემა შეუძლებელია. ვისურვებდი, რომ ყველა ქალი გამხდარიყოს დედა. 

- რა დროს უთმობთ შვილებთან ყოფნას?
- მათთან ძალიან დიდ დროს ვატარებ. ამაში სამსახურიც მიწყობს ხელს. მე და ბავშვები პრაქტიკულად სულ ერთად ვართ. ზაფხულობით ერთად მივდივართ დასასვენებლად. არ ყოფილა შემთხვევა, სადმე მათ გარეშე წავსულიყავი. საკმაოდ გონიერები და ცელქებიც არიან, თუმცა ვფიქრობ, რომ ეს ბავშვებისთვის ნორმალური მდგომარეობაა (იღიმის). 

- აღგვიწერეთ თქვენი ერთი ჩვეულებრივი დღე...
- სკოლის დღეებში ვცდილობ, შინ დაბრუნებულებს სახლში დავხვდე და აბსოლუტურად ჩართული ვიყო მათი სწავლა-განათლების პროცესში. დასვენების დღეებშიც სულ ერთად ვართ, სასეირნოდ დავდივართ და, რა თქმა უნდა, ისინი ირჩევენ, სად  წავალთ და რას გავაკეთებთ (იღიმის).

- ნიტას ხომ არ აქვს მოდელობის სურვილი?
- საოცრად „პრანჭიაა“, თუმცა მოდელობის სურვილი ჯერჯერობით არ გამოუთქვამს.

- რა უკრძალავთ შვილებს?
- ამ ეტაპზე მინდა, იყვნენ ზრდილობიანი, ამიტომ ხშირად ვესაუბრები წესიერებაზე... მომავალში არ ვიცი, რას ავუკრძალავ. საერთოდ, აკრძალვები არ მიყვარს, საკმაოდ ლმობიერი დედა ვარ, თუმცა ზღვარს ყოველთვის ვიცავ.

- თქვენი აზრით, როგორი თაობა მოდის და რას უსურვებთ მათ?
- საკმაოდ გონიერები არიან და ახალი თაობის დიდი იმედი მაქვს. ვუსურვებდი მშვიდობიან საქართველოში ცხოვრებას, საქართველოში, სადაც საკუთარი თავის რეალიზების საშუალება ექნებათ.

- ლალი ისევ მოდის სფეროში ხართ. რა სიახლეები გაქვთ?
- მეგობრებთან - ირინა ონაშვილთან, სოფო ბურჯანაძესთან, ლელა ცინცაძესთან ერთად სამოდელო სააგენტო „ფეშენ შარმს“ ვხელმძღვანელობ და დიდი წარმატებები გვაქვს. თითქმის 17 წელია, ამ საქმეს ვემსახურებით, რომელიც ძალიან გვიყვარს. გარდა იმისა, რომ ვმუშაობთ მოდელებთან, ვზრდით მათ და ახალბედებს საკუთარ გამოცდილებას ვუზიარებთ, ახალი ხაზის განვითარებაც დავიწყეთ - ეს არის ხელით ნაქსოვი ულამაზესი ჟაკეტები ბავშვებისთვის და არა მარტო მათთვის. ჯერ პატარების ხაზს ვამზადებთ, ძალიან მალე კი ვგეგმავთ ბრენდის L.L.S.I.-ის პრეზენტაციას, სადაც ჩვენი ნაწარმის ჩვენებას მოვაწყობთ.

ტექსტი მოამზადა ელიზავეტა გეგეშიძემ.