- მამა 26 წლის ასაკში გავხდი. ისე მოხდა, რომ ჩემი შვილის დაბადებას დავესწარი. თავიდან ცოტა დაბნეული ვიყავი, ვერ გადამეწყვიტა, დავსწრებოდი თუ არა მშობიარობას. ამაზე აზრი ვკითხე ჩემს მეუღლეს ანასტასია შმაკოვას, მან კი მიპასუხა, ძალიან ვნერვიულობ და გამიხარდება, თუ ჩემ გვერდით იქნებიო... პირველად მეგონა, ერთი, ორი და სამი და... ბავშვიც დაიბადებოდა, თუმცა არც ასეთი მარტივი აღმოჩნდა, პირიქით, იმაზე რთული ყოფილა, ვიდრე წარმომედგინა... როდესაც ჩემი შვილი სამყაროს მოევლინა, იმ მომენტში მის გვერდით ვიყავი. ბედნიერი ვარ, რომ იმ წამებს დავესწარი. ეს დაუვიწყარი და ნამდვილი სასწაული იყო. ცხოვრებაში მსგავსი არაფერი მინახავს. ახლა სახლში რომ მივდივარ და შინ დანიელი მხვდება, ეს უკვე სულ სხვა სიხარულია.
- მამის ამპლუაში თავს როგორ გრძნობ, რა დროს ატარებ შვილთან?
- სამწუხაროდ, მის გვერდით დიდ დროს ვერ ვატარებ. ტელევიზიაში მუშაობა, მოგეხსენებათ, რასაც ნიშნავს. დღესასწაულებზე მთელი საქართველო რომ ისვენებს, ჩვენ მაინც ვმუშაობთ. სულ ვცდილობ, სამსახურიდან ადრე დავბრუნდე სახლში და ჩემი ოჯახის გვერდით ვიყო, მაგრამ ხშირად ვერ ვახერხებ, რაზეც ძალიან მწყდება გული. არ მინდა, ჩემი შვილი ჩემ გარეშე გაიზარდოს და ბოლოს მივხვდე, რომ ის უკვე დიდია და მე მის გვერდით არც ისე ბევრი დრო მაქვს გატარებული... არ მინდა, დრო გამეპაროს.
- როგორი ბავშვია დანიელი, ხომ არ ჭირვეულობს?
- დანიელის ტირილის ხმას ვერც კი გაიგებთ. უყვარს თამაში და საკმაოდ აქტიური ბავშვია. გამიხარდებოდა, ჩემი შვილი კოსმონავტი გახდეს და ნასაში იმუშაოს, მაგრამ, ბუნებრივია, ეს ყველაფერი მისი გადასაწყვეტია, მე მას არჩევანში არ შევზღუდავ. დაე, მომავალი თავად აირჩიოს.
- შენი აზრით, რა განასხვავებს ძველსა და ახალ თაობას და რას უსურვებდი ახალგაზრდებს?
- ჩემი თაობის ბავშვები განათლებასა და ინფორმაციას სხვა წყაროებიდან ვიღებდით დღევანდელებისგან განსხვავებით, რომლებსაც ინტერნეტი აქვთ და განათლების მისაღებად უამრავი საშუალება არსებობს. ამიტომ ვუსურვებდი, ბევრი ისწავლონ და ჩვენზე ბევრად უფრო განათლებულები იყვნენ, რაც ჩემმა თაობამ ვერ შეძლო, მათ გააკეთონ და მშვიდობიან საქართველოში იცხოვრონ.
- თემო ამ ეტაპზე სად ხარ დასაქმებული?
- ამჟამად, ფაქოსთან და მშვენიერ ნინი გოგიჩაიშვილთან ერთად, გასართობი გადაცემის წამყვანი ვარ, რომელიც ყოველ ხუთშაბათს 22:30 წთ-ზე GDS-ის ეთერში გადის. გადაცემა გასართობიც არის, იუმორისტულიც და, მოწვეულ სტუმრებთან ერთად, შემეცნებითსა და რეალურ პრობლემებზეც ვსაუბრობთ (იუმორის ფარგლებში), რომლებიც საზოგადოებას ძალიან აწუხებს, ასევე, გვაქვს სპორტული და არასპორტული თამაშებიც. მოკლედ, მაყურებელს ვეტყოდი, უყუროს ჩვენს გადაცემას, რომელსაც ქართულ ტელესივრცეში ანალოგი არ აქვს. ეს GDS-ის პროდუქციაა, ეს უკვე თავისთავად ძალიან ბევრ რამეს ამბობს და, რაც ყველაზე მნიშვნელოვანია, აპოლიტიკურია. გვიყურეთ, გაერთეთ და განიტვირთეთ.
ტექსტი მოამზადა ელიზავეტა გეგეშიძემ.
