ასაკის, ჯანმრთელობის მდგომარეობის, მწეველობის „სტაჟისა“ და სხვა ფაქტორების გათვალისწინებით, შესაძლოა, სხვადასხვა ადამიანისთვის მონაცემი სხვადასხვა იყოს, მაგრამ ფაქტი ფაქტად რჩება - თქვენი ორგანიზმი სიგარეტისთვის თავის დანებების წამიდან გაჯანსაღებას იწყებს. ასე, მაგალითად:
20 წუთის შემდეგ
უკანასკნელი სიგარეტის მოწევიდან 20 წუთის შემდეგ, ორგანიზმში აღდგენის პროცესი იწყება. წნევა და პულსი ნორმაში დგება, უმჯობესდება სისხლის მიმოქცევის პროცესი და კიდურების ტემპერატურა ნორმას უბრუნდება.
8 საათის შემდეგ
ცნობილია, რომ სიგარეტის მოწევა იწვევს სისხლში ჟანგბადის დონის კლებას და აფერხებს ტვინისა და კუნთების ნორმალურ მუშაობას. მოწევის შეწყვეტიდან 8 საათის შემდეგ, სისხლში ნახშირჟანგის დონე იკლებს, ხოლო ჟანგბადის დონე იზრდება. ნაკლებად გამოხატულია მწეველისთვის დამახასიათებელი სიმპტომები (სპეციფიკური სუნი პირის ღრუდან, ხველება, ქოშინი და ა.შ.).
24 საათის შემდეგ
ორგანიზმი პრაქტიკულად ნორმალურ რეჟიმში ბრუნდება. სისხლში ნახშირჟანგის შემცველობა, საბოლოოდ, ნორმას უბრუნდება და გულის შეტევის შანსი მცირდება. მოწევის პერიოდში ორგანიზმში დაგროვილი ლორწო და ტოქსიკური ნივთიერებები ფილტვებიდან ნელ-ნელა გამოდის და სუნთქვა უფრო თავისუფალი ხდება. მოწევის პერიოდში დაზიანებული ნერვული დაბოლოებები ნელ-ნელა აღდგენას იწყებს.
72 საათის შემდეგ
ბრონქები თითქმის სრულიად თავისუფალია და სუნთქვა გაადვილებული. სისხლის შედედების მაჩვენებელი ნორმას უბრუნდება და თრომბების წარმოქმნის რისკი მცირდება.
2-დან 3 კვირამდე
ფილტვების სასიცოცხლო მაჩვენებელი 30%-ით იზრდება.
1-დან 9 თვემდე
ჯანმრთელობა შესამჩნევად გაუმჯობესებულია. ფილტვების ნორმალურად მუშაობასთან ერთად, მცირდება ინფექციური და გრიპოზული დაავადებების რისკი.
1 წლის შემდეგ
ნიკოტინის გარეშე კარდიოლოგიური დაავადებების რისკი, მწეველებთან შედარებით, ორჯერ მცირდება.
5 წლის შემდეგ
მავნე ჩვევაზე უარის თქმის შემდეგ, ყოფილ მწეველს, რომელიც დღეში ერთ კოლოფ სიგარეტს მოიხმარდა, ორჯერ უმცირდება ფილტვების, პირის ღრუს, ყელის ან საჭმლის მომნელებელი ორგანოების კიბოთი დაავადების რისკი.
ათი წლის შემდეგ
უკანასკნელი სიგარეტის გადაგდებიდან 10-15 წლის შემდეგ გულის დაავადებათა გაჩენის რისკი არამწეველი ადამიანის მონაცემებს შეესაბამება და ეს ჯანსაღი ცხოვრების წესის ერთადერთი უპირატესობა არ გახლავთ. რაც უფრო ხანგრძლივი და ძლიერი იყო ნიკოტინზე თქვენი დამოკიდებულება, მით მეტი დრო სჭირდება ორგანიზმს სრული რეაბილიტაციისთვის, თუმცა კარგი საქმის დაწყება არასოდეს არის გვიან.