გაგიკვირდებათ, მაგრამ ჩვენს პლანეტაზე ავტომანქანების რაოდენობა (10 მლრდ) ადამიანების რაოდენობას აჭარბებს, რადგან 2009 წლიდან ავტომწარმოებლებმა საჭიროზე მეტი პროდუქციის გამოშვება დაიწყეს.
ამავე მიზეზით, მსოფლიოში გაუსაღებელი მანქანების რიცხვი ყოველწლიურად იზრდება.
ეკონომისტები ამტკიცებენ, რომ მოსახლეობას ახალი ავტომობილების შესაძენი თანხა აღარ აქვს და ის დრო, როცა ოჯახი ყოველწლიურად ახალ მანქანას ყიდულობდა, დიდი ხანია, წარსულს ჩაბარდა.
ამჟამად, ადამიანები ახალი მანქანის შეძენას ძველის შეკეთებასა და ფაქიზად მოვლას არჩევენ.
გაუსაღებელი მანქანებისთვის ავტოსადგომების მოსაწყობად მწარმოებლებს ყოველწლიურად, ჰექტრობით მიწის ფართობების შეძენა უწევთ, თუმცა უზარმაზარი ზარალის მიუხედავად, „ჩაწოლილი პროდუქციის“ შეღავათიან ფასად გაყიდვა არ სურთ, რადგან გაუსაღებელი მანქანებზე ფასის დაკლებამ შეიძლება ძვირად ღირებული მანქანების გაყიდვა შეამციროს.
ავტომწარმოებლებს არც კონვეიერის გაჩერება შეუძლიათ, რადგან ეს ქარხნების დახურვას და სამსახურიდან ათასობით მუშის გაშვებას გამოიწვევს. ამასთანავე, მანქანათმშენებელი ქარხნების დახურვას „დომინოს პრინციპით“ სხვა ქარხნების დახურვაც მოჰყვება - ფოლადსასხმელი, საბურავების მწარმოებელი და ავტომობილების ნაწილებზე მომუშავე.
ზემოჩამოთვლილი მიზეზების გამო, მანქანათმშენებელი ქარხნები იძულებული არიან, ყოველკვირეულად ათიათასობით მანქანა გამოუშვან, რომელთა უმეტესობა ავტოსადგომზე დაჟანგვისთვის არის განწირული.
ორწლიანი დგომის შემდეგ ავტომობილის ძრავის ამუშავება მისი დაზიანების გარეშე თითქმის შეუძლებელია, ამიტომ ავტომწარმოებელს ერთადერთი გამოსავალი რჩება - მანქანა ნაწილებად დაშალოს ან დაპრესოს და ჯართში ჩააბაროს.
დიდ ბრიტანეთში, სვინდონის პროვინციაში ავტომობილების სასაფლაოა, სადაც ასიათასობით ავტომანქანა ჯართის ჩამბარებელ პუნქტში თავის რიგს ელის.
რუსეთში, პეტერბურგთან ახლოს მდებარე ასაფრენ ზოლზე ევროპიდან შემოყვანილი ათასობით ავტომობილი დგას და... ისინი არავის სჭირდება!
ყოველდღიურად საფრანგეთიდან ინგლისში ათიათასობით ახალთახალი „სიტროენის“ მარკის ავტომობილი გადაჰყავთ, რადგან საფრანგეთში მათი პარკირებისთვის ადგილი აღარ დარჩა.
მსოფლიოში „მანქანის სასაფლაოების“ რაოდენობა ყოველწლიურად იზრდება - მილიონობით ახალი ავტომობილი კონვეიერიდან იმისთვის ჩამოჰყავთ, რომ სამუდამოდ ავტოსადგომზე დააყენონ, სადაც წლების განმავლობაში, მზისა და წვიმის ზემოქმედების შედეგად დაიჟანგება და ფერფლად იქცევა.
