1. კაცობრიობის ისტორია ადასტურებს, რომ ადამიანები შეუცნობელ სამყაროს და იმას, რასაც დღეს მაგიას ვუწოდებთ, ყოველთვის შიშით ეკიდებოდნენ. ერთ-ერთი ვერსიის თანახმად, ფოტო მასზე აღბეჭდილი ადამიანის შესახებ ინფორმაციის მატარებელია. ზოგჯერ ეს შეიძლება საშიშიც იყოს, რადგან მაგებსა და მჩხიბავებს ფოტოდან ინფორმაციის ამოკითხვა არ უჭირთ და ამ ინფორმაციის ადამიანის წინააღმდეგ გამოყენებაც შეუძლიათ. ითვლება, რომ შავი მაგიის მიმართ ზრდასრულ ადამიანს მეტი „იმუნიტეტი“ აქვს, ვიდრე პატარას, ამიტომ ბავშვების სურათები უცხო თვალისგან განსაკუთრებით გულმოდგინედ უნდა დავმალოთ. ამ ვერსიას თუ დავეთანხმებით, ფოტოების გადაღებაზე საერთოდ უარი უნდა ვთქვათ. სოციალურ ქსელებში ფოტოს განთავსებაზე კი საუბარიც ზედმეტია.
2. მეორე ვერსია იმ შეხედულებიდან მომდინარეობს, რომ ძილის დროს ადამიანის სული სხეულს ტოვებს და მოგზაურობს. სწორედ ამით აიხსნება სიზმრების წარმოშობა. აქედან გამომდინარე, ადამიანები ბნელი ძალებისა და მაგიის ზემოქმედების წინაშე, განსაკუთრებით დაუცველები ძილის დროს არიან.
3. მესამე და ყველაზე უცნაური ჰიპოთეზა ევროპიდან შემოვიდა, რომლის თანახმადაც, მე-19 საუკუნეში ფოტოს გადაღება ფუფუნებად ითვლებოდა და ამის საშუალება მხოლოდ ძალიან მდიდარ ადამიანებს ჰქონდათ. სწორედ მათგან გახდა მოდური გარდაცვლილი ნათესავებისთვის სამახსოვრო ფოტოების გადაღება. რა თქმა უნდა, ფოტოს გადაღებამდე, გარდაცვლილს გამორჩეულ ტანსაცმელს აცმევდნენ და ფერ-უმარილით ალამაზებდნენ. ამ სურათების ნახვისას, ძნელი გასარჩევია, გარდაცვლილია ადამიანი თუ, უბრალოდ, სძინავს. არსებობს შემთხვევები, როცა ფოტოზე აღბეჭდილი მძინარე ადამიანი გარდაცვლილად ჩათვალეს და მის ოჯახს მიუსამძიმრეს.
4. ცრურწმენას ოდნავადაც არ უკავშირდება მხოლოდ მეოთხე მიზეზი, რომელიც გვასწავლის, რომ ზრდასრული, მძინარე ადამიანისთვის სურათის გადაღება არაესთეტიკური და არაკორექტულია. რაც შეეხება პატარებს, გამოცდილი ფოტოგრაფები მძინარე ბავშვების გადასაღებად, სპეციალურ ფოტოსესიებსაც კი აწყობენ, რასაც რამდენიმე მიზეზი აქვს: ძილში ბავშვი გაცილებით ბუნებრივი და თავისუფალია. არ ეშინია უცნობი „ბიძიასი“, არ ტირის და დედის ზურგს უკან არ იმალება.
როგორც ხედავთ, თითქმის ყველა მოსაზრება, რატომ არ შეიძლება მძინარე ადამიანისთვის სურათის გადაღება, ცრურწმენას უკავშირდება. ასე რომ, გადაიღეთ სადაც გინდათ, როცა გინდათ და როგორც გინდათ.
