ასე მოხდა 1938 წელსაც, როცა დუბასოვმა კომისიის წინაშე სამმანეთიანის ესკიზი წარადგინა. ფულის ნიშანზე საბჭოთა არმიის ჯარისკაცი იყო გამოსახული. კომისიის ერთ-ერთმა წევრმა ჩათვალა, რომ ჯარისკაცი არასწორად იყო ჩაცმული, რადგან ქამარი აირწინაღის ჩანთის მაღლა ეკეთა, წესით კი, პირიქით უნდა ყოფილიყო.
იმ დროს ადამიანები უმცირესი გადაცდომისთვისაც კი სასტიკად ისჯებოდნენ, ამიტომ საბჭოთა ჯარისკაცის „გამასხარავებისთვის“ მხატვარს შესაძლოა, ციმბირში ამოეყო თავი.
თავზარდაცემული დუბასოვი მოულოდნელად, თავდაცვის კომისარიატის ექსპერტებმა იხსნეს. მათი დასკვნის თანახმად, ჯარისკაცი წესდების მიხედვით იყო გამოწყობილი და მხატვარს კანონი არ დაურღვევია.
იმავე წელს, ხელისუფლებამ დუბასოვს რეკომენდაცია მისცა, რომ ხუთი მანეთის ესკიზზე ახალგაზრდა ქალი გამოესახა, მაგრამ, როცა მხატვარმა ესკიზი წარმოადგინა, მასზე გამოსახული იყო ახალგაზრდა დედა ორი შვილით. კომისიამ პროექტი დაიწუნა, რადგან ესკიზი ისეთ განცდას ტოვებდა, თითქოს მარტოხელა დედა, შვილებთან ერთად, ალიმენტის მისაღებად მიდის.
საბოლოოდ, გადაწყდა, რომ ბანკნოტზე საბჭოთა პარაშუტისტი გამოესახათ.
ზემოხსენებული ინციდენტების მიუხედავად, საბჭოთა ხელისუფლება ივანე დუბასოვის ნიჭსა და შემოქმედებით უნარებს ძალიან აფასებდა.
სწორედ დუბასოვი გახლდათ 1947 და 1961 წელს გამოცემული ფულის ნიმუშების ავტორი. 1959 წელს, როცა 1961 წლის ფულადი რეფორმისთვის მზადება იწყებოდა, მხატვარი სასწრაფოდ გამოიძახეს შვებულებიდან და ახალი ესკიზების შექმნა დაავალეს.
სამუშაო უმკაცრესად გასაიდუმლოებული იყო. მხატვრის სახლის ფანჯრებთან უშიშროების სამსახურის თანამშრომელთა სადღეღამისო მორიგეობა დაწესდა, თუმცა ყველაფერი მშვიდობიანად დამთავრდა და მხატვარმა ესკიზები დათქმულ დროში, ყოველგვარი შეფერხების გარეშე წარადგინა.
ცნობისთვის, დუბასოვი მხოლოდ საბჭოთა ფულის ავტორი არ ყოფილა. მან ფულის ნიშნების ესკიზები შექმნა სოციალისტური ჩინეთის, მონღოლეთის, ბულგარეთისა და გერმანიის დემოკრატიული რესპუბლიკისთვის.
ფულადი ნიშნების გარდა, დუბასოვი სახელმწიფო ჯილდოებისა და საფოსტო მარკების ესკიზებსაც ამზადებდა. სწორედ მისი ესკიზით შეიქმნა მედალი „ოქროს ვარსკვლავი“, რომელსაც საბჭოთა კავშირის გმირებს გადასცემდნენ.
1945 წელს მხატვარი ლენინის ორდენით დააჯილდოვეს, რომლის ესკიზის შექმნაშიც თავად მონაწილეობდა. ივანე დუბასოვი მონაწილეობდა საბჭოთა კავშირის სახელმწიფო გერბის შექმნაშიც. მისი უკანასკნელი ნამუშევარი გახლდათ მოსკოვთან ახლოს მდებარე ქალაქის ოდინცოვოს გერბის ესკიზი.
ივანე დუბასოვი 1988 წლის 15 მარტს, 91 წლის ასაკში გარდაიცვალა.
