ისტორია არაფერს ამბობს იმაზე, რატომ 1-ელ ივნისს და არა რომელიმე სხვა დღეს. ერთ-ერთი ვერსიით, 1925 წელს ჩინეთის გენერალურმა კონსულმა სან-ფრანცისკოში ჩინური წარმოშობის ობოლი ბავშვებისთვის დუნ-უცზეს (დრაკონი-ნავების) ფესტივალი მოაწყო, რომელიც 1-ელ ივნისს აღინიშნება. ბედნიერი შემთხვევის წყალობით, ფესტივალი ჟენევაში საბავშვო კონფერენციის ჩატარების დროს დაემთხვა.
მეორე მსოფლიო ომის შემდეგ, როცა ბავშვების ჯანმრთელობასა და კეთილდღეობაზე ზრუნვა ისეთი აქტუალური იყო, როგორც არასდროს, პარიზში 1949 წელს ქალთა კონგრესი გაიმართა. კონგრესზე მშვიდობის, როგორც ბავშვთა ბედნიერების ერთადერთი გარანტორის, შენარჩუნებისთვის ფიცი დადეს.
ბავშვთა დაცვის საერთაშორისო დღეს თავისი ოფიციალური დროშა აქვს - ზრდისა და ჰარმონიის აღმნიშვნელ მწვანე ფონზე განთავსებული დედამიწა ჩვენი საერთო სახლია, ხოლო მის გარშემო ადამიანების წითელი, ყვითელი, ცისფერი, თეთრი და შავი ფიგურები მრავალფეროვნებასა და მოთმინებას განასახიერებს.
ამ დღეს ბავშვებისთვის მრავალრიცხოვანი გასართობი და კულტურული ღონისძიება იმართება, მაგრამ ბავშვთა დაცვის დღე მხოლოდ მხიარული და გასართობი ღონისძიება არ გახლავთ - ეს არის საზოგადოებისთვის იმის შეხსენება, რომ ბავშვთა უფლებების დაცვა აუცილებელია, რათა ისინი ბედნიერები გაიზარდონ, ისწავლონ, საყვარელი საქმით დაკავდნენ და მომავალში თავიანთი ქვეყნის ღირსეულ მოქალაქეებად გაიზარდონ.
დაბოლოს, რამდენიმე საინტერესო ფაქტი ბავშვების ირგვლივ:
1. სეიშელის კუნძულებზე ბავშვთა დაცვის ერთ დღეს კი არა, მთელ თვეს აღნიშნავენ.
2. უძველესი სათამაშო 3000 წელზე მეტი ხნისაა. ის ძველი სპარსეთის ტერიტორიაზე აღმოაჩინეს და ლუვრში განათავსეს, რათა მისი ნახვა ყველა მსურველს შეძლებოდა.
3. კორეელი ბავშვები დანარჩენ მსოფლიოში მცხოვრებ თანატოლებზე 9 თვით უფროსები არიან. საქმე ის გახლავთ, რომ 9 თვე, რომელსაც ისინი დედის მუცელში ატარებენ, ახალშობილის ასაკად მიიჩნევა. შესაბამისად, კორეელი ბავშვი დაბადებისთანავე 9 თვისაა.
4. მსოფლიოში ყველაზე მეტი შვილი მაროკოს სულთან ისმაილს ჰყავს. მას 500 ცოლისგან 700 ვაჟი შეეძინა. სულთნის ქალიშვილების რაოდენობაზე კი ისტორია, სამწუხაროდ, არაფერს ამბობს.
P.S. გარე ფოტოზე 4 წლის ლტოლვილი სირიელი გოგონა ლტოლვილთა ბანაკში, თურქეთში. როგორც ფოტოგრაფი ნადია აბუ შაბანი ჰყვება, გოგონამ ფოტოობიექტივი იარაღად მიიჩნია და დანებების ნიშნად ხელები აწია.
ფოტო გადაღებულია 2015 წელს.