ფერდინანდმა განათლების დეფიციტის ყალბი დიპლომებით შევსება გადაწყვიტა და ძალები ადვოკატის, ინჟინრისა და მასწავლებლის პროფესიებში მოსინჯა.
მისი კარიერის მწვერვალი მაინც კანადურ გემ „კაიუგაზე“ სამხედრო ქირურგად მუშაობა გახლდათ, სადაც ქირურგ ჯოზეფ კაირის სახელზე გაცემული დიპლომი წარადგინა.
ცნობისთვის, ასეთი ქირურგი მართლაც არსებობდა, თუმცა ის გემზე კი არა, ნიუ-ბრუნსვიკის ერთ-ერთ კლინიკაში მუშაობდა.
ერთ-ერთი ბრძოლის დროს ეკიპაჟის 16-მა წევრმა უმძიმესი ჭრილობები მიიღო. ვინაიდან „კაიუგაზე“ დემარა ერთადერთი ქირურგი იყო, დაჭრილებისთვის ოპერაციის ჩატარება მას მოუწია. თვითმარქვია ექიმმა დაჭრილი სამხედროების საოპერაციოში გადაყვანა ბრძანა, თავად კი ქირურგიის სახელმძღვანელოსთან ერთად, რამდენიმე წუთით კაიუტაში ჩაიკეტა. წიგნისთვის თვალის გადავლების შემდეგ სკალპელს ხელი მოკიდა და ოპერაციების წყება ჩაატარა. დაუჯერებელია, მაგრამ ყველა ოპერაცია წარმატებით დასრულდა და დაჭრილების მდგომარეობა საგრძნობლად გაუმჯობესდა.
რამდენიმე დღეში ყველა გაზეთი ნიჭიერ ქირურგზე წერდა და სწორედ აქ მოხდა გაუთვალისწინებელი რამ - გაზეთი ჯოზეფ კაირის დედამ წაიკითხა.
მიუხედავად იმისა, რომ ტყუილი გამოაშკარავდა, გემის კაპიტანი დიდხანს ვერ იჯერებდა, რომ ადამიანს, რომელმაც 16 ჯარისკაცი სიკვდილს გადაარჩინა, მედიცინაზე ბუნდოვანი წარმოდგენა ჰქონდა.
დემარას წინააღმდეგ სისხლის სამართლის საქმეც კი არ აღუძრავთ და მან მშვიდობიანად მოახერხა სახლში დაბრუნება.
რა თქმა უნდა, ამ ინციდენტის შემდეგ სხვა ადამიანების სახელით ცხოვრება გართულდა, რადგან ფერდინანდს უკვე ყველა იცნობდა, თუმცა მიჩვეულის გადაჩვევა ძნელი აღმოჩნდა და მალე ფერდინანდმა ყალბი დიპლომით ერთ-ერთ ციხეში ფსიქოლოგად დაიწყო მუშაობა.
მალე სამსახურიდან სკანდალით გაათავისუფლეს, რადგან ერთ-ერთმა გაზეთების მოყვარულმა პატიმარმა მასში გემზე მომუშავე თვითმარქვია ქირურგი ამოიცნო.
ამის შემდეგ ფერდინანდი იძულებული გახდა, ნამდვილ დიპლომზე ეფიქრა. პორტლენდის ბიბლიური კოლეჯის დამთავრების შემდეგ, როგორც იქნა, 46 წლის ფერდინანდ დემარა განათლების დამადასტურებელ გაუყალბებელ დოკუმენტს ეღირსა და ერთ-ერთ საავადმყოფოში დაიწყო მუშაობა.
თვითმარქვია ქირურგი 1982 წელს გულის უკმარისობით გარდაიცვალა.