პროექტის ავტორები ასეთ დასკვნამდე თითქმის მილიონ-ნახევარი ადამიანის (60 წელს გადაცილებული 704 000 მამაკაცისა და 725 000 ქალის) გამოკითხვის შედეგად მივიდნენ.
გამოკითხვაში მონაწილეთა შესახებ ინფორმაცია შვედეთის ეროვნულ რეესტრში იქნა მოძიებული. ამასთანავე, გაითვალისწინეს გამოკითხვაში მონაწილეთა ოჯახური მდგომარეობა, შვილების სქესი, რაოდენობა და სხვა კრიტერიუმები.
ბუნებრივია, შვილების რაოდენობის მიუხედავად, ასაკის მატებასთან ერთად, ადამიანებში სიკვდილიანობის რისკი იზრდება, თუმცა, როცა მეცნიერებმა ყველა მონაცემი შეაჯამეს, ცხადი გახდა, რომ ხანდაზმულობის ასაკში შთამომავლობის ფაქტორს დიდი მნიშვნელობა აქვს.
კვლევამ აჩვენა, რომ 60 წლის შვილიან მამაკაცს შეუძლია, სულ მცირე, 18,4 წლის და ქალს 23,1 წლის სიცოცხლეზე გააკეთოს გათვლა.
მკვლევარები დარწმუნებული არიან, რომ შვილიანი ქალის სიცოცხლის ხანგრძლივობა საშუალოდ, წელიწად-ნახევრით მეტია, ვიდრე უშვილოსი. მამაკაცების შემთხვევაში კი ამ მაჩვენებელმა ორი წელი შეადგინა.
წლებთან ერთად, სიკვდილის ალბათობა შვილიანსა თუ უშვილო ადამიანებში იზრდება. თუ 60 წლის ასაკში ის მამაკაცებში 0,06%-ს და ქალებში 0,16%-ს შეადგენს, 90 წლის ასაკში ეს მაჩვენებელი უკვე 1,47% და 1,10%-ია.
მაგალითად, 80 წლის ასაკში შვილიანი მამაკაცის გარდაცვალების რისკი 7,4%-ს შეადგენს, როცა იმავე ასაკის უშვილო მამაკაცისთვის ეს მაჩვენებელი 8,3%-ია.
როგორც პროექტის ავტორებმა აღნიშნეს, ამ ფენომენის ახსნა ბიოლოგიური ფაქტორებითაა შესაძლებელი, თუმცა მნიშვნელოვანი როლი სოციალურ ფაქტორსაც აკისრია.
მშობლად ყოფნასა და სიცოცხლის ხანგრძლივობას შორის კავშირი ყველაზე კარგად მარტოხელა დედებისა და განსაკუთრებით, მამების შემთხვევებში ვლინდება.
მკვლევარები ვარაუდობენ, რომ ეს დაკავშირებულია მოზრდილი შვილების როგორც მორალურ, ასევე მატერიალურ მხარდაჭერასთან, ამიტომ ბიოლოგიური ფაქტორის გარდა, სოციალური ფაქტორიც მნიშვნელოვან როლს ასრულებს.
უცოლო მამაკაცი მეტად არის დამოკიდებული შვილების დახმარებაზე, როცა მარტოხელა ქალი შვილებზე მეტად, საკუთარი ძალების იმედზეა.
საინტერესოა, რომ უშვილობის ნეგატიური შედეგები მხოლოდ მოწიფულობის ასაკში ვლინდება, მანამდე კი შვილების ყოლა-არყოლა სიცოცხლის ხანგრძლივობაზე არ აისახება.
მკვლევარების დასკვნით, შვილის ან შვილების სქესი სიცოცხლის ხანგრძლივობაზე არავითარ გავლენას არ ახდენს.