ყავისგან განსხვავებით, რომელიც 1-2 საათი მოქმედებს, ენერგეტიკული სასმელის ეფექტი 3-დან 4 საათამდე გრძელდება. სასმელში შემავალი გაზი კომპონენტების ათვისებასა და ეფექტის სწრაფად დადგომას უწყობს ხელს.
ენერგეტიკული სასმელები ორ კატეგორიად იყოფა: ერთში კოფეინი ჭარბობს, მეორეში - ვიტამინები და ნახშირწყლები.
კოფეინიანი ენერგეტიკი ღამით მომუშავე ადამიანებისთვისაა განკუთვნილი, ხოლო ვიტიმინიზებული - აქტიური ადამიანებისთვის, რომლებიც თავისუფალ დროს სპორტულ დარბაზებში ატარებენ.
ადამიანის ძილიანობა და მოდუნება ორგანიზმში ნეირომედიატორების უკმარისობითაა გამოწვეულია. ესაა ნივთიერება, რომელიც ერთი ნერვიული უჯრედიდან მეორეს იმპულსებს გადასცემს. ენერგეტიკულ სასმელში შემავალი ამინომჟავები ამ დეფიციტს ავსებენ, თუმცა ენერგეტიკულ ვიტამინებს არ შეუძლია, მულტივიტამინური კომპლექსი შეცვალოს.
დღეისთვის ყველასთვის კარგად ნაცნობ RED BULL-ს, რომლის გამომგონებელი სწორედ ზემონახსენები დიტრიხ მატეშიჩია, ენერგეტიკული სასმელების ბაზრის 70% უკავია.
მისი მიღება აკრძალულია ბავშვების, ფეხმძიმე ქალებისა და გულ-სისხლძარღვთა სისტემის დაავადებების მქონე ადამიანებისთვის.
დაუშვებელია ენერგეტიკის ალკოჰოლურ სასმელთან და ყავასთან შერევა.
ენერგეტიკული სასმელი შეიცავს კარნიტინს. ესაა ადამიანის უჯრედის ბუნებრივი კომპონენტი, რომელიც ცხიმმჟავების სწრაფად ჟანგვას იწვევს. კარნიტინი აძლიერებს ნივთიერებათა ცვლას და ხსნის კუნთების დაღლილობას.
ენერგეტიკულ სასმელებში, ასევე, გვხვდება სამკურნალო მცენარეები გუარანა და ჟენშენი, რომლებიც მატონიზებელი თვისებებით გამოირჩევა.
მატონიზებელი სასმელების მოყვარულებს უნდა ახსოვდეთ, რომ კოფეინის დღიური ნორმის (ორი ქილა) გადაჭარბება არ შეიძლება, რადგან ორგანიზმის რესურსი ამოწურულია და სასურველი ეფექტის ნაცვლად, შეიძლება უკუშედეგი მიიღოთ.
ენერგეტიკული სასმელის ეფექტის დასრულების შემდეგ აუცილებელია, ორგანიზმი დაასვენოთ და ძალების ბუნებრივად აღდგენის საშუალება მისცეთ, რადგან არავინ იცის, როგორია თქვენი სისხლის მიმოქცევის სისტემის მარაგი.
გახსოვდეთ, ენერგეტიკული სასმელის დალევა სპორტული ვარჯიშების შემდეგ წნევის მკვეთრად მატებას იწვევს.
ადამიანისთვის კოფეინის სასიკვდილო დოზა, დაახლოებით, 10 გრამია, ანუ ენერგეტიკული სასმელის 150 ქილა. რა თქმა უნდა, ერთ ჯერზე ამდენის დალევას ერთი ადამიანი ვერ მოახერხებს, მაგრამ არც ის უნდა დაგავიწყდეთ, რომ ენერგეტიკის მიღებისას ადამიანი ორგანიზმს ატყუებს - დიახ, ის ნამდვილად ამხნევებს, მაგრამ ეს ხელოვნური მხნეობაა, ამიტომ სასმელის მიღებისას ზომიერება უნდა დაიცვათ.
ცნობისთვის: 2010 წლის დეკემბერში ამერიკის შეერთებული შტატების ხელისუფლებამ თავისი მოქალაქეების დაცვის მიზნით, ქვეყნის მთელ ტერიტორიაზე აკრძალა კოფეინის შემცველი ალკოჰოლური ენერგეტიკული სასმელების გაყიდვა.