გამოვიდა „სექსის სახელმძღვანელო მუსლიმანი ქალებისთვის“

წიგნს პირველიდან უკანასკნელ გვერდამდე „წითელ ზოლად“ გასდევს მთავარი აზრი - სექსი სამარცხვინო არ არის და მუსლიმან ქალებს სრული უფლება აქვთ, სექსით ისიამოვნონ. ამასთანავე, მამაკაცთან ურთიერთობაში შეუძლიათ, მეტი აქტიურობა გამოიჩინონ და თუ საჭიროა, ინიციატივა საკუთარ ხელში აიღონ.

წიგნის ავტორისთვის არავითარი შეზღუდვა არ არსებობს. ის მკითხველს, უბრალო კოცნით დაწყებული, სექსუალური აქტის პოზებით დამთავრებული, ყველაფერზე ესაუბრება.
რა თქმა უნდა, ასეთი წიგნის გამოსვლა შეუმჩნეველი არავის დარჩებოდა...

„მე უამრავი ქება და მოლოცვა მივიღე, თუმცა შეურაცხმყოფელი და საყვედურებით სავსე წერილიც ბევრი იყო. ერთმა ქალმა მომწერა, რომ ასეთი წიგნი საჭირო არ არის, რადგან მუსლიმანი ქალები სექსის თემაზე აუცილებელ ინფორმაციას დედისგან იღებენ. ყველაფერი გასაგებია, მაგრამ არ მგონია, მოიძებნებოდეს დედა, რომელიც შვილთან სექსზე ისევე გულახდილად ისაუბრებს, როგორც მე ამ წიგნში“, - ამბობს guardian-თან ინტერვიუში ავტორი.

ქალბატონი უმი უარყოფს ბრალდებას, რომ მისი წიგნი პრომისკუიტეტისკენ მოუწოდებს (უწესრიგო, შემთხვევითი, არარეგულირებადი სქესობრივი კავშირები). პირიქით, მისი თქმით, წიგნში საუბარია მხოლოდ ერთ მამაკაცთან, ანუ საკუთარ ქმართან ინტიმურ ურთიერთობაზე.
ამასთანავე, ქალის თქმით, მეუღლის მიმართ ვალდებულებები მხოლოდ ცოლს კი არა, ქმარსაც აქვს და სექსუალური განათლება მხოლოდ ქალებს კი არა, კაცებსაც სჭირდებათ.
და მართლაც, წიგნის ავტორს რჩევების მისაღებად მხოლოდ ქალები კი არა, კაცებიც უკავშირდებიან.