30 ჰექტარზე გადაჭიმული კუნძული წლების მანძილზე უკაცრიელი და არაფრით გამორჩეული ადგილი გახლდათ. 1965 წელს The Daily Telegraph ჟურნალისტმა და ფოტოკორესპონდენტმა იმის დასამტკიცებლად, რომ უკაცრიელ კუნძულზე ცხოვრება შესაძლებელია, ნეკერზე სამი კვირის გატარება გადაწყვიტეს. რეალობა იმაზე მკაცრი აღმოჩნდა, ვიდრე მედიის წარმომადგენლები ვარაუდობდნენ, ამიტომ ნეკერზე ორკვირიანი ცხოვრების შემდეგ, წითელი ალამი აღმართეს და კუნძულიდან ევაკუაცია ითხოვეს.
ფოტოკორესპონდენტის მონაყოლის თანახმად, ნეკერი გიგანტური კოღოებით სავსე ადგილი იყო, რომელიც ფრონტის წინა ხაზს მოგაგონებდათ:
„უზარმაზარი კოღოები, ფაქტობრივად, ბოლოს გვიღებდნენ. ისინი ისეთი აგრესიულები იყვნენ, რომ თავი ვიეტნამში ან კონგოში მეგონა“, - იხსენებდა ფოტოკორესპონდენტი.
1978 წელს ნეკერი აუქციონზე გასაყიდად გაიტანეს. ბრენსონს კუნძული მაშინვე მოეწონა, მაგრამ სხვადასხვა პრობლემის გამო, სწრაფად შეძენა ვერ შეძლო. საბოლოოდ, დიდმა ბრიტანეთმა მილიარდერს კუნძულის შეძენის უფლება მისცა, თუმცა მკაცრი პირობები დაუწესა: ოთხი წლის განმავლობაში ბრენსონს კუნძული უდაბნოდან ზღაპრულ კურორტად უნდა ექცია, წინააღმდეგ შემთხვევაში, სახელმწიფო მისი უკან დაბრუნების უფლებას იტოვებდა.
მილიარდერმა უკაცრიელ კუნძულზე ოაზისის გაშენება, ოთხის ნაცვლად, სამ წელიწადში შეძლო. მან მიწიერი სამოთხე მოაწყო ადგილზე, სადაც ქვიშის მეტი არაფერი იყო.
კუნძულზე, რომელსაც 100-კაციანი მომსახურე პერსონალი დაუქირავა, მილიარდერმა, დაახლოებით, 40 ადამიანზე გათვლილი რამდენიმე კოტეჯი ააშენა.
თვალწარმტაც კუნძულზე დასვენების მსურველს კოტეჯის ქირაობა დღეში $2167-ად შეეძლო. მთელი კუნძულის ერთი დღით ქირაობა კი $65 000 ღირდა. ქირის საფასურში შედიოდა კეთილმოწყობილი ბინა, პირადი მზარეული და კუნძულის პერსონალის მომსახურება.
ქარიშხალმა „ირმამ“ ნეკერს 2017 წლის 6 სექტემბერს გადაუარა. ამ დროს რიჩარდ ბრენსონი კუნძულზე იმყოფებოდა. თავი რომ გადაერჩინათ, ის და მისი თანამშრომლები ღვინის სარდაფში გამაგრდნენ. ეს ერთადერთი გონივრული გადაწყვეტილება აღმოჩნდა, რადგან მიწის ზემოთ მყოფი ყველა შენობა დაინგრა.
ბრენსონის ქონება, ძვირად ღირებული იახტებისა და აუზების ჩათვლით, მთლიანად განადგურდა.
„მსგავსი რამ არასოდეს მინახავს. ნეკერი მთლიანად განადგურებულია. კუნძულზე ერთი შენობაც კი არ გადარჩა. ტერიტორია უზარმაზარ ნაგვის გროვად იქცა“, - ამბობს უიღბლო მილიარდერი.