ყველაფერი იმით დაიწყო, რომ 22 წლის საიდშომ პრეზიდენტ ემომალი რახმონთან შეხვედრისას მისთვის დაწერილი ლექსი ხმამაღლა და ემოციურად წაიკითხა. მთავრობის მეთაური ისე მოიხიბლა, რომ გადაწყვიტა, ახალგაზრდა კაცისთვის, მადლიერების ნიშნად, ცხოვრების ღირსეული თანამგზავრი ეჩუქებინა.
საიდშოსთვის საცოლის მოსაძებნად, სპეციალური საპრეზიდენტო კომისია შეიქმნა, რომელმაც ხანგრძლივი ძიების შემდეგ არჩევანი 23 წლის მარჯონაზე შეაჩერა. როგორც მოსალოდნელი იყო, ქალიშვილი და მისი ოჯახი ქვეყნის პრეზიდენტის ნებას ვერ შეეწინააღმდეგნენ, რაც ერთმანეთისთვის სრულიად უცხო ადამიანების ქორწინებით დასრულდა.
ქორწილის ფოტოებმა სოციალური ქსელები მოიარა. მარჯონას სახე ყველაფერზე მეტყველებს. ერთი შეხედვითაც ჩანს, რომ გამოუვალ მდგომარეობაში ჩავარდნილი პატარძალი მომხდარით აღფრთოვანებული არ არის. გააგრძელებს თუ არა საიდშო ლექსების წერას, ჯერჯერობით, ესეც საკითხავია...