ეს უცნაური ამბავი რამდენიმე თვის წინ ქალაქ სამარაში მოხდა.
ადგილობრივმა სამართალდამცველებმა სატრანსპორტო საშუალების არამართლზომიერად დაუფლების ფაქტზე სისხლის სამართლის საქმე აღძრეს და ოპერატიული სამძებრო სამუშაოები დაიწყეს.
დეპოს ტერიტორიაზე დამონტაჟებული ვიდეოკამერების გაშიფვრის შედეგად გაირკვევა, რომ ნასვამი ქალები დეპოს ტერიტორიაზე ბუნებრივი მოთხოვნილებების დაკმაყოფილების მიზნით შევიდნენ. შემდეგ კი ტრამვაი გაიტაცეს და თვალს მიეფარნენ.
„სპეციალური მომზადების გარეშე ტრამვაის ადგილიდან დაძვრა შეუძლებელია. ეს მაფიქრებინებს, რომ ერთ-ერთ ქალბატონს ტრამვაის მართვის გამოცდილება ჰქონდა, თუმცა გაუგებარია, როგორ მოახერხეს მოხუცებმა გამშვები პუნქტის გავლა და ქალაქის ქუჩებში სეირნობა“, - განაცხადა მომხდარის კომენტირებისას დეპოს თანამშრომელმა.
საბოლოოდ, გატაცებული ტრამვაი ქალაქის ერთ-ერთ მოედანზე აღმოაჩინეს. გამტაცებლები კი მიმდებარე ტერიტორიაზე, ბაღში დააკავეს, სადაც არყის სმას განაგრძობდნენ და ხმამაღლა მღეროდნენ.
ეჭვმიტანილებმა პოლიციის განყოფილებაში ტრამვაის გატაცების ფაქტი აღიარეს.
გამოძიების მიმდინარეობისას, ტრამვაის დეპოს დირექტორმა დამნაშავეებში ყოფილი თანამშრომლები ამოიცნო. გაირკვა, რომ ერთ-ერთი ქალბატონი პენსიაში გასვლამდე დეპოში 18 წელი ტრამვაის მძღოლად მუშაობდა, მეორე კი კონტროლიორი გახლდათ. მხიარული შეკრების შემდეგ, მეგობრებს „ძველი დროის“ გახსენება და ტრამვაით გასეირნება მოუნდათ. ამასთანავე, გადაწყვიტეს, რომ სასიამოვნო სასარგებლოსთან შეეთავსებინათ. მოხუცებმა დაახლოებით 250 მგზავრი გადაიყვანეს, 1350 რუბლი გამოიმუშავეს და არაყი და ხორციანი ღვეზლები იყიდეს.
საზოგადოებრივი ტრანსპორტის გამტაცებლებს შვიდ წლამდე თავისუფლების აღკვეთა ან 200 000 რუბლის გადახდა ემუქრებათ, თუმცა დამნაშავეების ასაკიდან გამომდინარე, სავარაუდოდ, ყველაფერი სიტყვიერი გაფრთხილებით დასრულდება.