ფლორიდელ მოსწავლეებს სკოლაში გამჭვირვალე ჩანთებით სიარულს აიძულებენ

2018 წლის 14 თებერვალს აშშ-ის ფლორიდის შტატის სამხრეთ ნაწილში მდებარე პარკლენდის სკოლას შეიარაღებული მოზარდი თავს დაესხა. სროლის შედეგად, 17 ადამიანი დაიღუპა, 50-ზე მეტი კი დაიჭრა. ახალგაზრდა, რომელმაც ცეცხლი გახსნა, სკოლიდან ცუდი დისციპლინის გამო გარიცხული 19 წლის ნიკოლას დე ხესუს კრუზი აღმოჩნდა.
ტრაგედიის შემდეგ, პარკლენდის სკოლის ადმინისტრაციამ უსაფრთხოების ზომების გამკაცრება გადაწყვიტა და საგაზაფხულო არდადეგებიდან დაბრუნებულ მოსწავლეებს სკოლაში გამჭვირვალე ჩანთებით სიარული მოსთხოვა.

სკოლის ადმინისტრაცია ირწმუნება, რომ ეს მოსწავლეების უსაფრთხოებისთვის კეთდება, თუმცა მოზარდებს განსხვავებული მოსაზრება აქვთ. ისინი გამჭვირვალე ჩანთებსა და გამუდმებულ ჩხრეკას პირად ცხოვრებაში ჩარევად მიიჩნევენ.
გოგონები ამბობენ, რომ გამჭვირვალე ჩანთების გამო, ჰიგიენური ტამპონების დამალვას ვეღარ ახერხებენ, რისი დემონსტრირების სურვილიც არ აქვთ.
მოსწავლეებმა ცეცხლსასროლი იარაღის თავისუფლად გაყიდვა ორიგინალური ფორმით გააპროტესტეს - პროტესტის გამომხატველი ლოზუნგები გამჭვირვალე ჩანთებში მოათავსეს და სკოლის დერეფნებში მსვლელობა მოაწყვეს.
„ვაფასებთ მათ მცდელობას, ვინც ეს მოიფიქრა, თუმცა სკოლის ციხედ ქცევის ნაცვლად, ნამდვილ პრობლემაზე კონცენტრირება უნდა შევძლოთ“, - წერია ერთ-ერთი მოსწავლის ჩანთაზე.