ოჯახი, რომლის ექვსივე შვილი 28 თებერვალს დაიბადა

წლების წინათ ცოლ-ქმარი მზრუნველობამოკლებული ბავშვების შვილად აყვანაზე ოცნებობდა, თუმცა მანამდე საკუთარი შვილების გაჩენა სურდათ. წყვილის გეგმები 5 წლის წინათ შეიცვალა, როცა სახლში უცნობმა ქალმა დარეკა და ტყუპი ბავშვების შვილად აყვანა შესთავაზათ. კერისა და კრეიგს ბევრი არ უფიქრიათ და თანხმობა განაცხადეს.

„ჩვენ დაგვირეკა ტყუპების დედამ, რომელიც ისევ ტყუპებზე იყო ფეხმძიმედ. მან მითხრა, რომ ბავშვების გაზრდის საშუალება არ აქვს და სურს, კეთილ ადამიანებზე გააშვილოს. ვიგრძენი, რომ ღმერთი გამოცდას მიწყობდა, ამიტომ ყველა გეგმა გვერდით გადავდე და ბედის საჩუქარი მივიღე“, - ამბობს კერი.

ადალინი და კენი 2014 წლის 28 თებერვალს დაიბადნენ. სამი თვის შემდეგ კოსინკისების ოჯახმა ბავშვებზე ოფიციალური მზრუნველობა გააფორმა, თუმცა წინ კიდევ ერთი სიურპრიზი ელოდათ... ტყუპების ბიოლოგიურმა დედამ ფინანსურ პრობლემებს თავი ვერ გაართვა. საბოლოოდ, უფროსი ტყუპების გაშვილებაც გადაწყვიტა და ისევ კრეიგსა და კერის დაუკავშირდა. მცირეოდენი ფიქრის შემდეგ კოსინსკებმა ჯინჯერი და სისიც იშვილეს, რომლებიც 2013 წლის 28 თებერვალს იყვნენ დაბადებული.
რამდენიმე თვის შემდეგ კერი დაფეხმძიმდა. 2016 წლის ოქტომბერში ექიმებმა ქალს უთხრეს, რომ მალე ტყუპების დედა გახდებოდა.

ბავშვები 2016 წლის 12 ივნისს უნდა დაბადებულიყვნენ, მაგრამ კერის ფეხმძიმობა გაურთულდა. 19 კვირის შემდეგ ქალს ნაადრევი მშობიარობა დაეწყო და 28 თებერვალს ექიმებმა საკეისრო კვეთა ჩაატარეს.
მიუხედავად იმისა, რომ კერისა და კრეიგის ექვსივე შვილი 28 თებერვალს არის დაბადებული, კერის თქმით, თითოეული მათგანი ინდივიდუალურია. „ჩვენ ექვსივე თანაბრად გვიყვარს და სხვაგვარ ცხოვრებაზე არასოდეს გვიოცნებია“, - ამბობს მრავალშვილიანი დედა.