თითქოს სიკვდილის მოახლოება იგრძნო, 72 წლის მარტოხელა მოხუცმა რამდენიმე თვის წინ, 19 წლის შვილისთვის ახალი დედის ძებნა დაიწყო. ცერებრალური დამბლით დაავადებული ვიკა გამუდმებულ მზრუნველობას საჭიროებდა, ამიტომ მოხუცი მამა მშვენივრად ხვდებოდა, რომ მისი მარტო დატოვება არ შეიძლებოდა.
ეს ამბავი რუსეთში, სანკტ-პეტერბურგში მოხდა. ვალერი ორი წელი ეძებდა ახალ მშობლებს ვიკასთვის და ერთხელაც, ტელევიზორში ნახა სიუჟეტი, რომელშიც მრავალშვილიან დედაზე იყო საუბარი. ეკატერინეს 22 შვილიდან 19 ნაშვილები ჰყავდა.
„ვალერიმ ტელევიზორში ჩემს ოჯახზე გაკეთებული სიუჟეტი ნახა და სოციალურ ქსელებში მომწერა. რამდენიმე დღის შემდეგ მოხუცი ვიკასთან ერთად მესტუმრა, რომ გოგონა მომავალ და-ძმებს დაახლოებოდა“, - იხსენებს მრავალშვილიანი დედა.
ივნისის ბოლოს ვალერი და ვიკა ეკატერინას გაუფრთხილებლად ესტუმრნენ.
„სახლში შემოსვლისთანავე, ვალერიმ მითხრა: კატიუშა, სასწრაფო დახმარებას გამოუძახე. მგონი, ცუდად ვარ. ბრიგადა მალე მოვიდა და მოხუცი საავადმყოფოში წაიყვანა, მაგრამ ის გზაში გარდაიცვალა“, - ამბობს ეკატერინა.
ექსპერტიზამ დაადგინა, რომ მოხუცს გულის შეტევა სიკვდილამდე რამდენიმე საათით ადრე დაემართა, თუმცა უკანასკნელი ძალები მოიკრიბა და შვილის ახალ დედასთან მიყვანა მოასწრო.