რამდენიმე ათწლეულია, რაც მსოფლიოს მეცნიერები ფუტკრის რაოდენობის საგანგაშო კლებას აღნიშნავენ. თუ ასეთი ტენდენცია გაგრძელდა, სულ რაღაც 17 წლის შემდეგ, ანუ 2035 წლისთვის ფუტკარი, როგორც სახეობა შეიძლება მთლიანად გაქრეს. ეს უბედურების ნახევარია, რადგან ფუტკართან ერთად გაქრება დღეს არსებული, უმნიშვნელოვანესი აგროკულტურების მესამედი.
დიახ, სწორედ ფუტკრის დამსახურებაა, რომ ადამიანები მიირთმევენ უგემრიელეს ვაშლსა და პომიდორს და სვამენ არომატულ ყავას, რადგან პლანეტაზე არსებული მცენარეების 80% დამტვერვას სწორედ პატარა, მშრომელი ფუტკარი ახდენს. სტატისტიკური კვლევების ინსტიტუტის მონაცემების თანახმად, 2008 წლის შემდეგ რუსეთში ფუტკრის რიცხოვნება 40%-ით შემცირდა, ხოლო ამერიკაში შინაური ფუტკრის 80% და გარეული ფუტკრის 90% მთლიანად განადგურდა.
ჩინეთში ფუტკრის პოპულაციის გაქრობამ საქმე იქამდე მიიყვანა, რომ ფერმერები მცენარეებს ხელით ამტვერიანებენ. მაგალითად, პროვინცია სიჩუანში მუშები ვაშლის ხეების დამტვერიანებას ქათმის ბუმბულის ან სიგარეტის ფილტრის დახმარებით ცდილობენ. ჩინელი ფერმერების პრობლემების გათვალისწინებით, ადვილი წარმოსადგენია, რა შეიძლება მოხდეს გლობალურად - ფუტკრის პოპულაციის გაქრობის შემდეგ ჩვენი სუპერმარკეტები სანახევროდ დაცარიელდება.
მეცნიერები ფუტკრის გაქრობას რამდენიმე მიზეზით ხსნიან: ფუტკრის ავადმყოფობით, პესტიციდების გამოყენებით, გენეტიკურად მოდიფიცირებული მარცვლეული კულტურებითა და მილიონობით მობილური ტელეფონიდან მომდინარე ელექტრომაგნიტური გამოსხივებით.
ზოგიერთი მეცნიერი დარწმუნებულია, რომ ფუტკრის პოპულაციის გაქრობა გარკვეული სიხშირის ელექტრომაგნიტური გამოსხივებას უკავშირდება. კერძოდ, 2 გეგაჰერცი სიხშირის მესამე თაობის მობილური კავშირგაბმულობის ფართო გავრცელებას. სავარაუდოდ, ამ დიაპაზონში მდებარეობს ფუტკრის სიკვდილის ტალღა.
ფუტკრის პოპულაციის გაქრობის შემდეგ მთელი იმედი ფუტკრის ოჯახის მეორე წარმომადგენელზე - ბუსუსებიან ფუტკარზეა. მთელ მსოფლიოში უკვე გაჩნდა ფერმები, სადაც ამ მწერებს ამრავლებენ და ექსპორტზეც გაქვთ. ბუსუსებიანი ფუტკარი ადამიანს მოსავლის გაზრდაში ეხმარება და გამორიცხული არაა, რომ კაცობრიობის გადამრჩენადაც იქცეს.