5 ფილმი, რომელიც პულიცერის პრემიის გამარჯვებული პიესების მიხედვით გადაიღეს

აგვისტო: ოსეიჯის საგრაფო / August: Osage County

წელი: 2013

რეჟისორი: ჯონ უელსი

აღწერა: ფილმი ტრეისი ლეტსის პიესის მიხედვითაა გადაღებული, რომელმაც პულიცერის პრემია 2008 წელს დაისმახურა. ფილმში მსახიობთა შემადგენლობა შთამბეჭდავი: მერილ სტრიპი, ჯულია რობერტსი, იუენ მაკგრეგორი, კრის კუპერი, ჯულიანა ნიკოლსონი, ბენედიქტ კამბერბეტჩი. არც რეჟისურა მოიკოჭლებს და შედეგიც მოსალოდნელი დადგა - ორი ნომინაცია „ოსკარზე“. ატმოსფერო ჩეხოვის დრამებს მოგაგონებთ: გარდაიცვალა (უფრო სწორად უკვალოდ დაიკარგა) მამა, დიდი ოჯახი ერთად იკრიბება (მაგიდის ირგვლივ სამი და ერთად ზის), მაშინვე ძველი წყენები ტივტივდება, ისმის ურთიერთბრალდებები, ფარდა ეხდება იმას, რაც საიდუმლოდ უნდა დარჩენილიყო...

კურდღლის სორო / Rabbit Hole

წელი: 2010

რეჟისორი: ჯონ კემერონ მიტჩელი

აღწერა: ბეკი კორბეტის როლისთვის ნიკოლ კიდმანი „ოსკარზე“ საუკეთესო მსახიობი ქალისთვის იყო წარდგენილი. მან არაჩვეულებრივად შეძლო თავისი გმირის, დედის, რომელმაც შვილი დაკარგა და ცდილობს, ამ საშინელებას გაუმკლავდეს, ტკივილისა და შინაგანი წინააღმდეგობების გადმოცემა. ფილმი დევიდ ლინდსი-ებერის პიესის მიხედვითაა გადაღებული, რომელმაც პულიცერის პრემია 2007 წელს მოიპოვა.

ეჭვი / Doubt

წელი: 2008

რეჟისორი: ჯონ პატრიკ შენლი

აღწერა: „თუ თქვენ გჭირდებათ ნომინაცია „ოსკარზე“, მაშინ ქალის მთავარ როლზე მერილ სტრიპი აიყვანეთ“, - ეს საკმაოდ ცნობილი კინოხუმრობაა. მაგრამ ყველა ხუმრობაში არის სიმართლის მარცვალი... მაშ ასე, „ეჭვი“ ექვსჯერ იყო ნომინირებული ოსკარზე. მერილ სტრიპს ნამდვილად შეეძლო „ოსკარის“ მოპოვება დედაო ელიზა ბოვიეს როლისთვის. ფილმის სიუჟეტი 1964 წელს კათოლიკური ეკლესიის სკოლაში ვითარდება. უნდა აღინიშნოს, რომ სცენარის ავტორი და ფილმის რეჟისორი ჯონ პატრიკ შენლია, რომელმაც ფილმი საკუთარი პიესის მიხედვით გადაიღო, რომელმაც პულიცერის პრემია 2005 მოიპოვა.

ქირა / Rent

წელი: 2005

რეჟისორი: კრის კოლუმბუსი

აღწერა: 1996 წელს როკ-მიუზიკლ „Rent“-ის პრემიერამ დიდი წარმატებით ჩაიარა. რეჟისორი, კომპოზიტორი და ტექსტის ავტორი ჯონათან ლარსონი იყო. სიუჟეტის ფუძე ოპერა „ბოჰემა“ გახდა. პრინციპში, ლარსონმა „ვესთსაიდური ამბის“ წარმატების გამეორება შეძლო. ლარსონის როკ-მიუზიკლის სიუჟეტის ცენტრში ნიუ-იორკის ბოჰემური წვეულებებია, რომლებშიც იმ დროის რეალობაა თავმოყრილი: შიდსი, ნარკოტიკი და ურთიერთობები. შედეგი: პულიცერის პრემია 1996 წელს. 9 წლის შემდეგ როკ-მიუზიკლის კინოვერსია კრის კოლუმბუსმა („ორასი წლის ადამიანი“, „ჰარი პოტერის“ პირველი ორი ნაწილის რეჟისორი) გადაიღო.

მტკიცებულება / Proof

წელი: 2005

რეჟისორი: ჯონ მედდენი

აღწერა: ეს ფილმი ატმოსფეროთი 2001 წელს გადაღებულ „ბრწყინვალე გონებას“ მოგაგონებთ. თუმცა სიუჟეტური მსგავსებაც არის: სიგიჟის ზღვარზე მისული გენიოსი მათემატიკოსი, გაუცხოება... აღსანიშნია, რომ დევიდ ობერნის პიესამ პულიცერის პრემია სწორად 2001 წელს დაიმსახურა. მაგრამ „მტკიცებულება“ გარკვეულ ასპექტებში „ბრწყინვალე გონებაზე“ უფრო საინტერესოა. სიუჟეტის ცენტრში მამის, არანორმალური გენიოსი მათემატიკოსის (ენტონი ჰოპკინსი) და მისი არანაკლებ გენიალური ქალიშვილის (გვინეთ პელტროუ) ურთიერთობაა. ჰოპკინსის გმირი კვდება, მისი ქალიშვილი კი მამის დაწყებულ ნაშრომს ამთავრებს (უფრო სწორად - თავად აკეთებს). მაგრამ სამეცნიერო საზოგადოება არ იჯერებს, რომ ამ კვლევის ავტორი ის არის და სხვისი აღმოჩენის მისაკუთრებაში ადანაშაულებს.