დიუნკერკი / Dunkirk
ქრისტოფერ ნოლანის მორიგი შესანიშნავი ნამუშევარი. მოვლენები 1940-იან წლებში ვითარდება.
ისტორია დიუნკერკის ოპერაციაზე მოგვითხრობს, რომლის დროსაც 338 226 ჯარისკაცის ევაკუაცია მოხდა, მათ შორის იყვნენ ინგლისელები, ბელგიელები და ფრანგები. ფილმი არ მოგვითხრობს კონკრეტულ პერსონაჟსა და მის ცხოვრებაზე, ის ისტორიული მოვლენის არსზე გვიყვება, სადაც არის შიში და უამრავი ადამიანის ემოცია. მთავარ როლებში ტომ ჰარდი და კილიან მერფი არიან, თუმცა მთავარი აქცენტი მათზე არ კეთდება.
მეფე არტური: ლეგენდა მახვილზე / King Arthur: Legend of the Sword
ყველასთვის ნაცნობი ლეგენდა არტურზე, რომელმაც მახვილის ქვიდან ამოღება შეძლო, კიდევ უფრო მძაფრი და ემოციურია ჯად ლოუს (ანტაგონისტი) და ჩარლი ჰანამის მონაწილეობით. დინამიკა, კოლორიტული პერსონაჟები და მათი ხუმრობები ძველ ისტორიას საოცრად თანამედროვეს ხდის. თანაც, ეს ხომ გაი რიჩის ფილმია და წინ ბევრი სიურპრიზი გელით.
ტიტების ციებ-ცხელება / Tulip Fever
ჯასტინ ჩადვიკის ფილმში მთავარ როლებში ოსკაროსანი მსახიობები ალისია ვიკანდერი და ქრისტოფ ვალცი არიან. ფილმის სახელი მეტაფორა არ არის. ისტორიაში ნამდვილად იყო ასეთი პერიოდი - 1636-1637 წლებში ნიდერლანდებში ტიტებზე მოთხოვნა ძალიან გაიზარდა, რის გამოც ფასმა საგრძნობლად მოიმატა. ამის ფონზე სასიყვარულო დრამა ვითარდება. მდიდარი მამაკაცი თავისი ცოლის დასახატად სახლში ახალგაზრდა მხატვარს მიიყვანს, რომელსაც ეს ქალი შეუყვარდება...
