ვიკიპედიის ინფორმაციით, „პა ფლოტსკი“ ვინმე ჩარლზ ფლოტსმა გამოიგონა, თუმცა ვინ იყო ჩარლზ ფლოტსი, ეს არ არის ნახსენები და სხვაგანაც ვერსად წავაწყდით
სხვათა შორის, იტალიურ სამზარეულოშიც არის ზუსტად მსგავსი კერძი, სახელად Pasta fiottarini.
პრინციპში, რა მნიშვნელობა აქვს, ვინ და როგორ, მთავარია, რომ კარგი რაღაც მოიგონა.
„პა ფლოტსკის“ მომზადების უამრავი ვარიანტი არსებობს. ხშირად მას სტაფილოს, ტომატსა და სუნელებს უმატებენ, მაგრამ კლასიკური ვარიანტი მხოლოდ 5 ინგრედიენტისგან შედგება.
წარმოგიდგენთ მაკარონი „პა ფლოტსკის“ კლასიკურ რეცეპტს 1965 წლის კულინარიული წიგნიდან.
მაკარონი „პა ფლოტსკის“ მოსამზადებლად საჭიროა:
მაკარონი - 300-350 გრ;
საქონლის ხორცის ფარში - 500 გრ.
ხახვი - 100 გრ. (2-3 საშუალო თავი);
კარაქი - 100 გრ;
მარილი - გემოვნებით.
მაშ ასე:
ქვაბში ჩაასხით 2 ლიტრი ცივი წყალი და დადგით ცეცხლზე ასადუღებლად. როგორც კი წყალი წამოდუღდება, დაამატეთ მარილი, ცოტა აცალეთ და შემდეგ ჩაყარეთ მაკარონი. არ დაგავიწყდეთ, რომ მაკარონს ამოურიოთ.
პარალელურად, გაცხელებულ ზეთმოსხმულ ტაფაზე გადაიტანეთ საქონლის ხორცის ფარში და მოთუშეთ. ფარშს ხშირი მორევა სჭირდება.
როგორც კი შენიშნავთ, რომ ფარში მოითუშა, დაამატეთ დაჭრილი ხახვი, მარილი და განაგრძეთ მისი მომზადება ხახვის მოთუშვამდე.
ამასობაში მაკარონიც მოიხარშა. გადაწურეთ ქვაბიდან ზედმეტი წყალი. თუკი ფარშის მომზადებამდე ჯერ კიდევ დროა დარჩენილი, მაკარონში 1-2 სუფრის კოვზი მცენარეული ზეთი ჩაასხით და მოურიეთ, რათა მაკარონი ერთმანეთს არ მიეკრას.
ამასობაში ფარშიც მოითუშება.
ქვაბიდან მაკარონი ხორციან ტაფაზე გადაიტანეთ, საგულდაგულოდ ამოურიეთ და კიდევ რამდენიმე წუთით დატოვეთ ცეცხლზე, სანამ კარგად მოიბრაწება.
თუკი კარგად დაბრაწული მაკარონი არ გიყვართ, შეგიძლიათ, ხორცი მაკარონიან ქვაბში გადაიტანოთ და მოურიოთ. ამ შემთხვევაში კარგად მოთუშული „პა ფლოტსკი“ გამოგივათ.
შენიშვნა:
სურვილის მიხედვით, ამ კერძს ოდნავ შაქარსაც უმატებენ და ტომატსაც, თუმცა, შაქრიანი და ტომატიანი „პა ფლოტსკი“ კლასიკური ვარიანტი არ არის, ექსპერიმენტის მიზნით ცდა კი ღირს;
არ არის აუცილებელი, კერძისთვის საჭირო ინგრედიენტები აუცილებლად გრამებში აწონოთ. კალკულაცია ბუღალტრებისთვისაა, მზარეულებს ის დიდად არ სჭირდებათ. ინგრედიენტები შეგიძლიათ, თვალის ზომით განსაზღვროთ.
„პა ფლოტსკის“ მოსამზადებლად შეგიძლიათ, ნებისმიერი სახეობის მაკარონი გამოიყენოთ (სპაგეტიც კი), გარდა ვერმიშელისა;
კლასიკურ რეცეპტში მითითებულია კარაქი, თუმცა, შეგიძლიათ, კარაქი მცენარეული ზეთით შეცვალოთ.
გაითვალისწინეთ, რომ, თუ ფარში გაყინულია, სანამ ტაფაზე შესაწვავად დადებთ, აუცილებლად უნდა გაალღოთ, წინააღმდეგ შემთხვევაში კერძი მშრალი გამოვა;
თუკი შენიშნავთ, რომ ტაფაზე მოთუშვისას ხორცი ძალიან გამოშრა, ცოტა ადუღებული წყალი დაამატეთ;
დაბოლოს: თუკი ვინმე გეტყვით, რომ „პა ფლოტსკი“ შეგიძლიათ, „ტუშონკითაც“ მოამზადოთ, არ დაუჯეროთ. ის იქნება მაკარონი „ჯარისკაცული“.
გემრიელად მიირთვით!
