მწვანე ლობიოს რეცეპტს რესტორან „შატროს“ გამოცდილი კულინარი დავით გიორგბერიძე გვთავაზობს.
კერძის მოსამზადებლად საჭიროა:
მწვანე ლობიო - 1 კგ;
კვერცხი - 5 ცალი;
პომიდორი - 1/2 კილო;
ქინძი - 100 გრ;
რეჰანი - 50 გრ;
ნიორი - 50 გრ;
ხახვი - 200 გრ;
მარილი და წიწაკა - გემოვნებით.
მომზადების წესი:
მწვანე ლობიოს მოატეხეთ თავი და ბოლო, გადატეხეთ რამდენიმე ნაწილად, კარგად გარეცხეთ და მოხარშეთ.
როგორც კი ლობიო მოიხარშება, გადაწურეთ და გადაიტანეთ ცალკე ჯამზე. ქვაბის ძირზე მოასხით ზეთი, მოთუშეთ წვრილად დაჭრილი ხახვი და ჯამზე მოთავსებული გაწურული ლობიო ხახვიან ქვაბში გადაიტანეთ.
დაახლოებით, 5-10 წუთის შემდეგ დაამატეთ კანგაცლილი, საშუალო ზომებზე დაჭრილი პომიდორი.
როგორც კი შეამჩნევთ, რომ პომიდორი ქვაბში კარგად მოითუშა, ჯერ დაამატეთ ათქვეფილი კვერცხი, ბოლოს კი - დაჭრილი მწვანილები, ნიორი, მარილი და პილპილი.
შენიშვნა:
მწვანე ლობიოს ხარშვის დროს დაამატეთ 1/2 ჩაის კოვზი სოდა. ასე ლობიო ფერს არ შეიცვლის.
თუკი შენიშნეთ, რომ კერძი სქელი გამოვიდა, შეგიძლიათ, ოდნავ წყალი დაამატოთ.
მწვანე ლობიოს, სურვილისამებრ, ქონდარს ან შაშკვლავს უმატებენ.
გემრიელად მიირთვით!
