შემადგენლობა:
ორცხობილა „საიუბილეო“ – 200 გრ.
არაჟანი - 500 გრ.
კარაქი - 100 გრ.
ხაჭო - 150 გრ.
შაქარი - 120 გრ.
ჟელატინი - 10 გრ.
ვანილი - 10 გრ.
ლიმონი - 1 ცალი.
მწვანე ფერის ჟელე - 1 შეკვრა.
მომზადების წესი:
1. ორცხობილა ხელით ან ბლენდერით კარგად დაფშვენით და ოთახის ტემპერატურაზე დარბილებულ კარაქთან კარგად აურიეთ.
2. აიღეთ ტორტის ფორმა (სასურველია, კლასიკური 22 სმ. დიაგონალის). ძირზე დაუფინეთ საცხობი ქაღალდი. კარაქისა და ორცხობილას მასა ფორმაში გადაიტანეთ და ხელით კარგად გაასწორეთ. ტორტის ფორმა მაცივარში ნახევარი საათით მოათავსეთ.
3. დაასხით ჟელატინს 100 მლ. ოთახის ტემპერატურის წყალი და 10 წუთით გააჩერეთ. ამის შემდეგ დაბალ ცეცხლზე დაადგით და განუწყვეტელი მორევით გააცხელეთ (ადუღება არ შეიძლება). როგორც კი ჟელატინის გრანულები გადნება, ჯამი ცეცხლიდან გადმოდგით.
4. საცერში გატარებულ, ერთგვაროვან კონსისტენციამდე დაყვანილ ხაჭოს დაუმატეთ შაქარი, არაჟანი, ვანილი და 2 ს/კ ლიმონის წვენი. ყველაფერი კარგად ათქვიფეთ, სანამ შაქარი მთლიანად არ გადნება.
5. ხაჭოსა და არაჟნის ნაზავში ნელ-ნელა და თქვეფის შეუჩერებლად დაამატეთ გამდნარი ჟელატინი. მიღებული კრემი ტორტის ფორმაში მოთავსებულ ორცხობილას ფენას დაასხით და 2 საათით მაცივარში შედგით.
6. მწვანე ჟელე (სავარაუდოდ, კივის არომატით) შეფუთვაზე მითითებული ინსტრუქციით, მაგრამ 100 მლ-ით ნაკლები წყლის დამატებით მოამზადეთ. შეაგრილეთ და მაცივრიდან გამოღებულ ტორტზე მოასხით.
ამის შემდეგ ტორტი მაცივარში დააბრუნეთ და 4-5 საათით დატოვეთ, რათა ტორტის ყველა ფენა თანაბრად გაცივდეს.
7. სუფრასთან მიტანის წინ ტორტი ფორმიდან ამოიღეთ და ლიმონის ნაჭრებით გააფორმეთ.
გემრიელად მიირთვით!