ცოტა განსხვავებული სპეციფიკით მომზადებული უგემრიელესი ხარშო იხვისგან.
1 იხვის ხორცი
5 წვრილად დაჭრილი საშუალო სიდიდის ხახვი
200-300 გრ. გატარებული ან გახეხილ-დაფქული ნიგოზი
საშუალო ზომის 5 კბილი ნიორი
ორი ჩაის კოვზი ხმელი სუნელი (შერეული უცხო სუნელი და ხმელი ქინძი (1:3)
მარილი და ცხარე წიწაკა გემოვნებით
მომზადების წესი
დაბალ ცეცხლზე, ხახვთან ერთად, უცხიმოდ მოშუშეთ აკურატულად დაჭრილი იხვი. ხშირად ურიეთ, ხახვი კარგად უნდა მოიშუშოს, ჩაიფუფქოს. თითქოს „ჩადნაო“ და ხორციც თითქმის მზად იქნება. ფრთხილად, არ გამოაშროთ. ტომატს დაამატებთ თუ არა, თქვენი ნებაა. თუ კვაწარახის ან ტყემლის ჩამატებას აპირებთ, არ გირჩევთ, იხვს გემო ეკარგება და ვითომ ჩახოხბილს ემსგავსება. ჩაამატეთ ცოტა წყალი, ისე, რომ ხორცი დაიფაროს და ისევ მორევით შუშეთ. ეს სამი-ოთხი წუთი გრძელდება. შემდეგ ისევ ჩაამატეთ წინაზე მეტ წყალი და უკვე თავდახურულ ქვაბში ხუთი წუთი ადუღეთ. მორევა საჭირო აღარ არის.
ჯამში ჩაყარეთ გატარებული ნიგოზი, დაუმატეთ ცოტა ადუღებული წყალი, იმდენი, რომ ნიგოზი კარგად გაიხსნას. ჩაყარეთ ხმელი სუნელი და ნიორიც იქვე ჩაჭყლიტეთ.
ხორცი გასინჯეთ და თუ უკვე კარგად არის მოხარშული, ნიგვზიანი მასა ხორციან ქვაბში ჩაასხით და კარგად მოურიეთ. ჩაამატეთ მარილი და წიწაკა, ადუღეთ კიდევ 5-7 წუთამდე, თან შიგა და შიგ ურიეთ. ბოლოს ჩაამატეთ კვაწარახი, ერთხელ კიდევ წამოადუღეთ და გადმოდგით. სოუსი სქელი უნდა იყოს. მიირთვით გემრიელად.
შენიშვნები:
იხვის ხარშოს დამატებითი ცხიმი არ სჭირდება. ეს ფრინველი, მიუხედავად იმისა, გარეგნულად გემსუქნებათ თუ არა, სამყოფ ცხიმს ხორცშივე „ატარებს“.
იხვის ცხიმს კარგად არეგულირებს ნახევარი ჩაის კოვზი კვაწარახი, ან ერთი სუფრის კოვზი მჟავე ტყემალი, ან ჩაის კოვზი ღვინის ძმარი, ან, სულაც, ასი გრამი თეთრი მშრალი ღვინო, რომელსაც გამზადებულ ხარშოს ჩავუმატებთ, მხოლოდ ერთხელ წამოვადუღებთ და გადმოვდგამთ.
ბოლო დროს ხშირად ვიყენებ დაფქულ ქურქუმასაც და ძალიან კარგად „ჯდება“ საკმაზში;
არ გირჩევთ ტომატს ან დაჭრილ პამიდორს – ჩემი დაკვირვებით, საკუთარის გარდა, სხვა სიმჟავეს პამიდორი ვერ ეგუება და ბულგარულ წიწაკასავით „აშარი“ ხდება.
პირადად, იხვის ხარშოს ჭამა ცოტა გამაგრებულ პურთან ერთად უფრო მომწონს, მაგრამ ბევრი ღომთან არჩევს.
ძალიან უხდება მშრალი წითელი ღვინო, მაგრამ ეს თქვენს გემოვნებაზეა, თუ ლალისფერი ღვინო გაქვთ, მაგალითად, „ალადასტური“, მაშინ... იფ, იფ, იფ.
არაყიც უხდება.