ერთი ულუფა (4 პერსონაზე)
სტაფილო - 250 გრ
წითელი ბულგარული წიწაკა - 150 გრ
ისპანახი - 300 გრ
ნიორი - 50 გრ
ხახვი - 100 გრ
ტომატ-პასტა - 50 გრ
ქინძი, ოხრახუში - 50-50 გრ
შაქარი - 30 გრ
ძმარი - 10 გრ
ზეთი - 50 გრ
სუნელები: გამხმარი რეჰანი, უცხო სუნელი, ხმელი ქინძი, დაფქვილი შავი პილპილი, დაფქვილ წითელი წიწაკა. მარილი გემოვნებით.
მომზადების წესი:
ისპანახს და სტაფილოს ცალ-ცალკე ვხარშავთ, ისე რომ ძალიან არ ჩაიხარშოს.
ხახვს და მწვანილს ცალ-ცალკე წვრილად ვჭრით, მოხარშულ ისპანახს კი - ჩვეულებრივად. ტაფაზე ვასხამთ ცოტა ზეთს, ვყრით დაჭრილი ხახვის ნახევარს და ვწვავთ მანამ, სანამ ოქროსფერს არ მიიღებს. შემდეგ ვაყრით დაჭრილი ისპანახის ნახევარზე მეტს და 10 წუთის განმავლობაში ვთუშავთ (ისპანახის მცირე ნაწილი შემდგომ სოუსის მოსამზადებლად დაგვჭირდება).
მოთუშვის პროცესში ვაყრით ცოტა მარილს, შავ პილპილს. ნიორს ვჭრით წვრილად, შემდეგ კი მის ნახევარს, დაჭრილი მწვანილის ნაწილთან ერთად, ვყრით ტაფაში და ამ ყველაფერს კიდევ 2 წუთს ვთუშავთ. კერძის ეს ნაწილი მზადაა და მოზრდილ თეფშზე გადმოგვაქვს.
ქვაბში ვასხამთ წყალს, ვადუღებთ, ვყრით 30 გრ შაქარს, ვასხამთ ცოტა ზეთს და ძმარს. შემდეგ მასში ვყრით წითელ ბულგარულებს 3-4 წუთით, რათა ცოტა შერბილდეს. დარბილებულ ბულგარულებს თითოეულს შუაზე ვჭრით (ნახარშს ნუ გადაასხამთ, დაგჭირდებათ). 
სტაფილოს ვჭრით კუბიკებად, ხახვის დარჩენილ ნაწილს ვყრით ზეთმოსხმულ ტაფაზე და სტაფილოსთან ერთად 10 წუთი ვთუშავთ. პროცესში ვაყრით დარჩენილ ნიორს, ცოტა პილპილს, დაფქვილ რეჰანს, დაფქვილ წიწაკას, უცხო სუნელს, ხმელ ქინძს, ტომატ-პასტას, დარჩენილი მწვანილის ნაწილს და მარილს. მოთუშულ სტაფილოს ვიღებთ ცალკე თეფშზე, შუაზე გაჭრილი ბულგარული წიწაკების თითოეულ ნაწილში კოვზით ვალაგებთ და თეფშზე დადებულ ისპანახს ვულაგებთ გვერდით.
სოუსი:
დარჩენილ მწვანილს და ისპანახს ვყრით ბლენდერში, ვასხამთ, დაახლოებით, 50 გრ ბულგარულის ნახარშს, ცოტა მარილს და ვაბლენდერებთ. სოუსიც მზადაა.
შენიშვნა:
კერძის მომზადებას, დაახლოებით, 25 წუთი დასჭირდება.
კერძი ყველა ეტაპზე საშუალო ცეცხლზე უნდა გავაკეთოთ.
მოზრდილ თეფშზე მისი დალაგებისას შეგიძლიათ, ფანტაზიას მიმართოთ.
„ბომარტის“ მომზადება, დაახლოებით, 4.80 ლარი დაგიჯდებათ.
გემრიელად მიირთვით!..
