„მოჰიტო“ და ცეცხლოვანი „სექსი პლაჟზე“ – მოამზადეთ სახლში

კოქტეილი „მოჰიტო“

შემადგენლობა:
დაახლოებით, 5-6 ღერი პიტნა
ნახევარი ლიმონი
50 გრ ტონიკი (თუ არ გვაქვს, „სპრაიტიც“ გამოდგება)
50 გრ თეთრი რომი „ბაკარდი“
50 გრ რომი
ნახევარი ჭიქა ქრეშირებული (დაფშვნილი) ყინული
მწვანე მონინი

მომზადების წესი:

ახალი, მწვანე პიტნის ფოთლებს ღეროები მოაცალეთ  და ოდნავ დასრისეთ. იმისთვის, რომ კოქტეილის ჭიქას არომატი ჰქონდეს, დასრესილი პიტნის ფოთლები, ჭიქაში ჩაყრამდე, ჭიქას შიდა მხრიდან კარგად მოუსვით. ლიმონის ნახევარი სამ ან ოთხ ნაწილად გაჭერით და ჭიქაში ჩაუშვით. მომცრო ზომის სანაყით პიტნა და ლიმონი ჭიქაშივე ჩასრისეთ.
მიღებულ მასას დაასხით თეთრი რომი „ბაკარდი“, ცოტა მოურიეთ და ჩაამატეთ დაფშვნილი ყინული, შემდეგ ტონიკი ან „სპრაიტი“ და ბოლოს მწვანე შეფერილობის პიტნის არომატიანი მონინი. სახლის პირობებში შესაძლებელია მონინის შაქრის სიროფით ჩანაცვლება. კარგად მოურიეთ და არომატული და მაცოცხლებელი „მოჰიტოც“ მზადაა.

შენიშვნა:
კოქტეილის მოსამზადებლად დაგჭირდებათ 5-7 წუთი.
ტონიკის რაოდენობა გემოვნებაზეა გამოკიდებული.
თუ გსურთ, რომ კოქტეილი ძალიან მძაფრი არ გამოვიდეს, მეტი ტონიკი დაამატეთ.
დალევისას კოქტეილთან ერთად პიტნის ფოთლები რომ არ შეგყვეთ, სასურველია, „მოჰიტო“ წვრილი საწრუპით მიირთვათ. 

კოქტეილი „Sex on the Beach“

შემადგენლობა:
50 გრ ბროწეულის მონინი (სიროფი)
50 გრ ფორთოხლის წვენი
50 გრ არაყი
50 გრ მწვანე ფერის მონინი
ყინულის კუბიკები 

მომზადების წესი:
კოქტეილის ჭიქაში ყრით ყინულის კუბიკებს;
ასხამთ წითელი ბროწეულის მონინის;
ამატებთ ფორთოხლის წვენს
და ბოლოს არაყს.
კოქტეილის ფერადოვნებისთვის არაყს დაამატეთ მწვანე შეფერილობის მონინი. საბოლოოდ, მიიღებთ წითელი, ყვითელი და მწვანე შეფერილობის ცეცხლოვან კოქტეილს, რომელიც სრულიად ამართლებს თავის სახელწოდებას.

შენიშვნა:
კოქტეილის მოსამზადებლად დაგჭირდებათ 5-7 წუთი.
თუ მაცივარში მონინი არ მოგეპოვებათ, მისი ჩანაცვლება შესაძლებელია ჟოლოს ან რომელიმე სხვა კენკროვანი ხილის მურაბით, რომელსაც სქელი და მძიმე წვენი აქვს.

გემრიელად მიირთვით!