ბეზეს ფირფიტებისთვის საჭირო ინგრედიენტები:
12 კვერცხის ცილა
1კგ. 200 გრ შაქარი
მწიკვი ლიმონმჟავა და მარილი
3 კვერცხის ცილა კარგად ათქვიფეთ, ისე, რომ ჯამის გადმობრუნებისას ბეზე არ გადმოდიოდეს.
თქვეფის შეუჩერებლად, ნელ-ნელა დააყარეთ 300 გრამი შაქარი, მწიკვი ლიმონმჟავა და მარილი.
გამზადებული ბეზე გადაიტანეთ ცხიმწასმულ კალკაზე და ძალიან დაბალ ცეცხლზე, დაახლოებით, საათ-ნახევრის განმავლობაში აცხვეთ.
ასე გაიმეორეთ ოთხჯერ და მიიღებთ გამომცხვარი ბეზეს ოთხ ფენას.
პირველი კრემის ინგრედიენტები:
200 გრამი კარაქი
1 ქილა შესქელებული რძე
ვანილი
კარაქი კარგად ათქვიფეთ. ნელ-ნელა დაუმატეთ 1 ქილა შესქელებული რძე და ვანილი.
3 წუთი კიდევ თქვიფეთ და კრემი მზადაა.
მეორე კრემის ინგრედიენტები:
1 ლიტრი რძე
2 ჭიქა შაქარი
1 ჭიქა ფქვილი
150 გრამი კარაქი
1 ქილა შესქელებული რძე
ლიმონისა და ფორთოხლის ცედრა.
რძე ჩაასხით ქვაბში და ცეცხლზე დაადგით.
ცალკე ჯამში ერთმანეთში კარგად აურიეთ შაქარი და ფქვილი.
რძე რომ ადუღებამდე მივა, ჩაყარეთ ერთმანეთში არეული შაქარი, ფქვილი და ცეცხლზევე დაიწყეთ მიქსერით თქვეფა.
კრემი რომ წამოდუღდება, მიქსერი გამორთეთ, ქვაბი გადმოდგით და კრემი გააცივეთ.
ცალკე ჯამში ათქვიფეთ კარაქი და თითო-თითო კოვზობით შეათქვიფეთ შესქელებული რძე.
ბოლოს ათქვეფილი კარაქი და გაციებული კრემი ერთად ათქვიფეთ, ლიმონისა და ფორთოხლის ცედრა დაუმატეთ და მეორე კრემიც მზადაა.
ტორტის მომზადების წესი:
ფენების აწყობისას უნდა გახსოვდეთ, რომ გამომცხვარი ბეზეს ფენა მოხარშულ კრემთან კონტაქტისას დნება.
სწორედ ამის თავიდან ასაცილებლად გვჭირდება პირველი კრემი.
ტორტის მოსამზადებლად ბეზეს პირველ ფენას წაუსვით პირველი კრემი და ამის შემდეგ მეორე.
სანამ ბეზეს პირველ ფენას მეორეს დაადებდეთ, მეორეს ქვემოდან წაუსვით პირველი კრემი. დაადეთ პირველ ფენაზე და იგივე გაიმეორეთ, რაც პირველი ფენის შემთხვევაში, ანუ ჯერ პირველი კრემი და შემდეგ მეორე.
ასე გააგრძელეთ ბოლომდე.
კარგი იქნება, თუ კრემთან ერთად ფენებს ძალიან თხლად წაუსვამთ შინდის ჟელეს.
ეს ტორტს განუმეორებელ არომატს მიანიჭებს, მაგრამ ამ შემთხვევაში მეორე კრემს ლიმონი აღარ უნდა დაუმატოთ.
ბოლო ფენას თავზე კრემი აღარ წაუსვათ და მხოლოდ შაქრის პუდრა მოაყარეთ.
გემრიელად მიირთვით!