ფენოვანი ცომის ინგრედიენტები:
750 გრამი ცივი წყალი
ნახევარი ჩაის კოვზი მარილი
მეოთხედი ჭიქა ზეთი
მეოთხედი ჭიქა სპირტი ან არაყი
მეოთხედი ჩაის კოვზი ლიმონმჟავა
დაახლოებით, ერთი კილო ფქვილი
500 გრამი მარგარინი „უსტამი“ ან „დილა“
ცომის მომზადება:
ცივ წყალს დავუმატოთ მარილი, ზეთი, სპირტი (ან არაყი) და ლიმონმჟავა.
ყველაფერი კარგად ავურიოთ და დავამატოთ იმდენი ფქვილი, რომ საშუალოზე მაგარი ცომი გამოვიდეს.
ცომი და მარგარინი გავყოთ ორ ნაწილად.
ცომის თითო ნახევარს დავადოთ მარგარინის თითო ნახევარი, კონვერტისებურად გადავკეცოთ და გავაბრტყელოთ.
ასე (ოღონდ მარგარინის გარეშე) გავიმეოროთ სამჯერ და 20 წუთით შევდგათ მაცივარში, ოღონდ არა საყინულე კამერაში.
მაცივრიდან გამოღების შემდეგ ცომი ისევ გავაბრტყელოთ და დავჭრათ სასურველი ზომისა და ფორმის ნაჭრებად.
ამ ცომისგან შესაძლებელია, ყველასთვის საყვარელი „ნაპოლეონის“, კრემიანი მილაკების (ეწ. ტრუბოჩკების), ნამცხვარი „ენის“ ან ფენოვანი ხაჭაპურის გაკეთება.
შენიშვნა:
თუ ფენოვანი ცომისგან მთლიანი „ნაპოლეონის“ ან „ნაპოლეონის“ ნაჭრების გაკეთებას აპირებთ, უნდა გახსოვდეთ, რომ ცომი თავიდან მაღალ ტემპერატურაზე ცხვება.
როგორც კი ფენები ამოფუშფუშდება, ტემპერატურას ნელ-ნელა უნდა დაუკლოთ და ნამცხვარს გამოშუშება აცადოთ. გაციებულ ფენებს წაუსვით მოხარშული კრემი, ხოლო „ენების“ შემთხვევაში, უბრალოდ, მოაყარეთ შაქრის ფხვნილი.