ქამა სოკო სულგუნით რესტორან „შატროს“ მზარეულ დათო გიორგბერიძის რეცეპტით.
მასალა 2 ულუფისთვის:
ქამა სოკო - 0.5 კგ
სულგუნი - 100 გრ
მარილი - გემოვნებით
მომზადების წესი:
კარგად გარეცხილ ქამა სოკოს მოაშორეთ ძირები და დააყარეთ მარილი.
ღუმელში მაღალ ტემპერატურაზე გააცხელეთ კეცი.
გაცხელებულ კეცს მოასხით ზეთი და დაალაგეთ ზედ ქამა სოკო - ამოჭრილი მხარე ქვემოთ მოაქციეთ.
როგორც კი ერთი მხარე შეიწვება - დაახლოებით, 7-8 წუთში - სოკო ამოაბრუნეთ.
ნახავთ, რომ მის ქუდში თავისივე წვენი დაგროვდება.
სწორედ ამ წვნიან „ჯიბეში“ ჩააწყვეთ სულგუნის პატარა კუბიკები და ისევ შეაცურეთ კეცი ღუმელში.
როგორც კი შეამჩნევთ, რომ სულგუნი დაიბრაწა და სოკოც შემწვარია - დაახლოებით, 10 წუთში - ღუმელი გამორთეთ და კეცი გამოიღეთ.
კერძი მზად არის.
გემრიელად მიირთვით!
შენიშვნა:
იმისთვის, რომ 2 ულუფა ქამა სოკო სულგუნით მოამზადოთ, დაახლოებით, 7 ლარი და, მაქსიმუმ, 25-30 წუთი დაგჭირდებათ.
თუკი კეცი არ გაქვთ, მისი მომზადება ტაფაზეც შეგიძლიათ, ოღონდ ამ შემთხვევაში ღუმელი არ დაგჭირდებათ - გაზქურაზე მოამზადეთ.