ტარტალეტკების შიგთავსად შეიძლება გამოიყენოთ ნებისმიერი ხილი, ჟელე და კრემი. მეტიც, ამ არაჩვეულებრივ ნამცხვარში ძალიან ეფექტურად გამოიყურება ხორცის, ბოსტნეულისა და სხვადასხვა სალათების გულსართიც.
მიცკევიჩის #29 მდებარე კაფე „იდეალის“ გამოცდილი კონდიტერი ნონა კალანდაძე ექსკლუზიურად „funtime“-ის მკითხველისთვის, სრულიად განსხვავებული და უნივერსალური კალათების რეცეპტს გაგვიმხელს, რომელიც შეგიძლიათ როგორც სამარხვო, ისე ხსნილ დღეებში გამოიყენოთ.
ცომის ინგრედიენტები:
250 გრამი მარგარინი „ონა“
2 სუფრის კოვზი ზეთი
1 ჭიქა შაქრის პუდრა
2 სუფრის კოვზი წყალი
მწიკვი მარილი
1/2 ჩაის კოვზი სოდა
დაახლოებით, 2-3 ჭიქა ფქვილი.
ჩამოთვლილი ინგრედიენტები ერთმანეთში კარგად აურიეთ და იმდენი ფქვილი დაუმატეთ, რომ პლასტელინივით დამყოლი ცომი გამოგივიდეთ.
გამზადებული ცომი მაცივარში ნახევარი საათით გააჩერეთ.
შემდეგ პატარა გუნდებად დაყავით და სათითაოდ მოათავსეთ წინასწარ ფქვილში ამოვლებულ ფორმებში. თითების მოძრაობით (და ფქვილის დახმარებით) ცომი ისე უნდა გაანაწილოთ, რომ მხოლოდ ძირი და კედლები დაფაროს და არა მთლიანად ფორმა.
კალათის ფორმები საშუალო ცეცხლზე გამოაცხვეთ და გამოცხობისთანავე ფორმებიდან ამოიღეთ.
კალათის შიგთავსი:
შიგთავსის შერჩევა საკუთარი გემოვნებით შეგიძლიათ, თუმცა შეგახსენებთ, რომ ტარტალეტკას მომჟავო არომატები უხდება.
კალათის ძირში შეგიძლიათ ჩადოთ 1 ჩაის კოვზი შინდის ან ნებისმიერი მომჟავო არომატის ჯემი.
ჯემის თავზე კი ჩვეულებრივი მოხარშული კრემი ან ბეზე.
თუ სამარხვო კალათების გაკეთებას აპირებთ, ჩვენი სამარხვო კრემი ამისთვის იდეალური ვარიანტია.
კრემის ინგრედიენტები:
1 ჭიქა თბილი წყალი
2 სუფრის კოვზი ფქვილი
2 სუფრის კოვზი შაქარი
1 სუფრის კოვზი მარგარინი „დაჩა“.
ფქვილი და შაქარი ერთმანეთს კარგად შეურიეთ.
დაასხით თბილი წყალი და ნელ ცეცხლზე მოადუღეთ.
კარგად გაციებულს შეათქვიფეთ მარგარინი „დაჩა“.
კალათის თავზე „დამასრულებელი აკორდის“ როლს ნაღების კრემი შეასრულებს, რომელიც მაღაზიებში იყიდება და სამარხვო პარმალატის რძეს ეძახიან.
პროპორციით 1:1-ზე ნაღები წყალში გააზავეთ და კარგად ათქვიფეთ.
თუ თქვენი კალათები სამარხვო არაა, შესქელებული რძის დამატებაც შეგიძლიათ.
ეს კრემს განუმეორებელ არომატს მიანიჭებს.
გამზადებულ კალათებს თავზე კარამელი ან გამდნარი შოკოლადი მოასხით და ხილით გააფორმეთ.
გემრიელად მიირთვით!
კაფე „იდეალის“ ტორტები და ნამცხვრები შეგიძლიათ ნახოთ ვებ-გვერდზე caffeideal.ge