ცომგამოცლილი აჭარული ხაჭაპურის რეცეპტი სპეციალურად FunTime-ს მკითხველებისთვის ბათუმის „აჭარული ხაჭაპურის სახლის“ გამოცდილმა მზარეულმა მამუკა მამულაშვილმა გაგვიმხილა.
მასალა 1 ცალი აჭარული ხაჭაპურისთვის:
საფუარიანი ცომი - 300 გრამი;
სულგუნი - 150 გრამი;
იმერული ყველი - 150 გრამი;
ფქვილი - 250 გრამი;
კვერცხი - 2 ცალი;
კარაქი - 20 გრამი;
შიგთავსის მომზადების წესი:
მსხვილად გახეხილი ყველი - სულგუნი და იმერული - ჩაყარეთ თასში, დაასხით ცოტა წყალი ან რძე, დაახალეთ ზედ ერთი კვერცხი და ზილეთ ისე, რომ ერთგვაროვანი მასა გამოვიდეს.
მომზადების წესი:
მაგიდაზე დაყარეთ ცოტა ფქვილი, დადეთ ზედ ცომი და გააბრტყელეთ თხლად, ოღონდ ისე, რომ ცომის ორივე ბოლოში სქელი ფენა დარჩეს.
ცომი სქელი ფენებიდან, ორივე მხრიდან, გადაკეცეთ შუამდე, მიეცით ნავისებური ფორმა, შუაგული კარგად გაუფართოეთ და შიგ მოათავსეთ ყველისგან მომზადებული მასალა.
შემდეგ გადაიტანეთ ცხიმწასმულ გამოსაცხობ ფორმაზე, გადაუსვით წყლიანი ფუნჯი და შედგით 250-300 გრადუსზე გაცხელებულ აირღუმელში.
10-15 წუთის შემდეგ, როგორც კი ცომი დაბრაწვას დაიწყებს, „ჟარონა“ გამოიღეთ.
ყველი კოვზით მოაგროვეთ ხაჭაპურის ცენტრში, ამოაცალეთ გვერდებიდან ცომი ჩაის კოვზის დახმარებით, ჩაახალეთ გულში ერთი ცალი კვერცხი ცილის გარეშე და კვლავ შეაბრუნეთ ღუმელში, დაახლოებით, 1-2 წუთით.
შემდეგ გამოიღეთ ღუმელიდან, გადაიტანეთ მოზრდილ თეფშზე და შუაგულში ჩადეთ 20 გრ კარაქი.
სულ ეს არის.
შენიშვნა:
ცომგამოცლილი აჭარული ხაჭაპურის გამოცხობას, დაახლოებით, 15 წუთი დასჭირდება;
თუკი აჭარულ ხაჭაპურს სულგუნისა და იმერული ყველის ნაზავით გამოაცხობთ, გაცილებით გემრიელი გამოგივათ;
ერთი ცალი ცომგამოცლილი აჭარული ხაჭაპურის მომზადება, დაახლოებით, 3 ლარი დაგიჯდებათ.
გემრიელად მიირთვით!