განსხვავებული „სომხური ქადა“

პროდუქტი ცომისთვის:

• მარგარინი - 600 გრ
• ფქვილი - 1 კგ
• ლიმონის მჟავა - ჩაის კოვზის მესამედი
• მარილი - ჩაის კოვზის მესამედი
• ზეთი - 70 გრ

ქადის ცომის მომზადება:

საშუალო ზომის ჯამში ჩაყარეთ ფქვილი.

დაუმატეთ მარილი, ლიმონმჟავა, ზეთი და იმდენი წყალი, რომ საშუალო სისქის ცომი მოიზილოს.

გამზადებული ცომი გაყავით სამ ნაწილად.

თითოეული ნაწილი გააბრტყელეთ და წაუსვით 200 გრამი მარგარინი (ზოგი დიასახლისი მარგარინს აციებს და შემდეგ ცომზე სახეხის დახმარებით ახეხავს, მაგრამ ჩვენ დარბილებულ მარგარინს ვამჯობინებთ).

მარგარინის წასმის შემდეგ ცომი კარგად დაკეცეთ და ნახევარი საათით მაცივარში შეინახეთ.

შემდეგ გამოიღეთ და ისევ გააბრტყელეთ - ამჯერად მარგარინის წასმა საჭირო არ არის, უბრალოდ, გააბრტყელეთ, დაკეცეთ და ისევ მაცივარში შეინახეთ.

ცომის სამივე ნაწილის სამჯერ გაბრტყელებისა და მაცივარში ვიზიტების შემდეგ, შეგიძლიათ, ცხობას შეუდგეთ.

გაითვალისწინეთ, რომ ეს ფენოვანი მაცივარში 24 საათის განმავლობაში შეგიძლიათ შეინახოთ და ცხობა თქვენთვის ხელსაყრელ დროს დაიწყოთ.

პროდუქტი ქადის შიგთავსისთვის:

• კარაქი ან მარგარინი - 250 გრ
• ზეთი - 50 გრ
• შაქარი - 500 გრ
• ფქვილი - 500 გრ
• ვანილი

ქადის შიგთავსის მომზადება:

ტაფაზე დაყარეთ ფქვილი და დაბალ ცეცხლზე ოდნავ „მოხალეთ“.

ფქვილი ფერს რომ შეიცვლის, დაუმატეთ შაქარი, კარაქი (ან მარგარინი), ზეთი, ვანილი და კარგად მოურიეთ.

ადის გულსართი მზადაა.

ქადის გამოცხობა:

ცომის თითოეული ნაწილი გააბრტყელეთ და მიეცით მოგრძო ფორმა.

დააყარეთ ქადის გულსართის მესამედი, გადაახვიეთ და დაჭერით თქვენთვის სასურველ ნაჭრებად.

გამოაცხვეთ ზომიერ ცეცხლზე და ცხობის დასრულებისას, თავზე გადაუსვით რძეში ან წყალში ათქვეფილი კვერცხის გული.

გემრიელად მიირთვით!

ესეც სცადეთ:

მარტივი ფენოვანი ცომი - ფრანგული უნივერსალური რეცეპტი

ფენოვანი ცომი მარგარინით