ფაჰლავა მზადდება ფენოვანი ცომისგან, სიროფისა და ნიგვზისგან. ამ გემრიელ დესერტს მსოფლიოს სხვადასხვა კუთხეში სხვადასხვანაირად ამზადებენ. თურქული და აჭარული ფაჰლავის ცხობა საკმაოდ შრომატევადი პროცესია და დიდ დროს მოითხოვს, ამიტომ შედარებით მარტივ რეცეპტს შემოგთავაზებთ, რომელიც თავისუფლების მოედნის N4-ში მდებარე საკონდიტრო „lik@nik“-ის გამოცდილმა კონდიტერმა დოდო ებანოიძემ ექსკლუზიურად „funtime“-ის მკითხველისთვის გაგვიზიარა.
ფაჰლავის ცომის შემადგენლობა:
კვერცხი - 10 კვერცხის გული
მაწონი - 1/2 ქილა
მარგარინი - 250 გრ.
სოდა ძმრით - 1/2 ჩაის კოვზი
ვანილი.
ცომის მომზადების წესი:
კვერცხის გულებს დაასხით მაწონი და ათქვიფეთ.
შემდეგ დაუმატეთ დარბილებული მარგარინი, სოდა ძმრით, ვანილი და იმდენი ფქვილი, რომ საშუალო სიმაგრის ცომი მოიზილოს.
ცომი გაყავით ოთხ ნაწილად.
ფაჰლავის გულის შემადგენლობა:
10 კვერცხის ცილა
შაქარი - 3 ჭიქა
ლიმონმჟავა - 1/2 ჩაის კოვზი
ვანილი, 200 გრ.
მოხალული ნიგოზი
100 გრ ქიშმიში.
მომზადების წესი:
კვერცხის ცილები კარგად ათქვიფეთ.
ღრუბლის კონსისტენციის რომ გახდება, ნელ-ნელა დაუმატეთ შაქარი, ლიმონმჟავა და ვანილი.
როცა ბეზე იმდენად გამაგრდება, რომ ჯამის გადმობრუნებისას არ დაიღვენთება, ჩააყარეთ ნიგოზი, ქიშმიში და ხის კოვზით მოურიეთ.
ფაჰლავის მომზადების წესი:
ცომის ერთი ნაჭერი გააბრტყელეთ გაზქურის ლანგრის ზომაზე.
წაუსვით ნამცხვრის გული, დააფარეთ მეორე ფენა და ასე გაიმეორეთ მეოთხე ფენამდე.
ნამცხვარს კიდეები გადაუკეცეთ, თავზე კვერცხის გული გადაუსვით და ჰაერღუმელში დაბალ ცეცხლზე შედგით.
ცხობის დრო 45 წუთიდან 1 საათამდეა.
როგორც კი ჰაერღუმელიდან გამოიღებთ, ფაჰლავას თავზე თაფლი გადაუსვით და დაჭერით.
გემრიელად მიირთვით!
ფოტოგრაფი: ნინი მანდარია