1 ულუფა ქათმის სალათის მოსამზადებლად საჭირო მასალა:
ქათმის ფილე - 150 გრ;
პომიდორი ჩერი - 100 გრ;
კიტრი - 30 გრ;
სტაფილო - 30 გრ;
ბულგარული წიწაკა (წითელი და მწვანე) - 30 გრ;
ხახვი - 1 პატარა თავი;
შებოლილი ყველი - 40 გრ;
სულგუნი - 40 გრ;
სალათის ფურცლები 60 გრ.
მარილი და შავი პილპილი - გემოვნებით.
სოუსისთვის საჭირო მასალა და მომზადების წესი:
მაიონეზი - 50 გრ;
ტკბილი მდოგვი - ნახევარი ჩაის კოვზი;
მეოთხედი ლიმონის წვენი;
გატარებული ნიგოზი - 10 გრ;
სოიოს სოუსი - 10 გრ.
ეს ყველაფერი ერთმანეთში საგულდაგულოდ აურიეთ.
ქათმის სალათის მომზადების წესი:
შესაწვავად მომზადებულ ფილეს მოაყარეთ მარილი, შავი პილპილი და ორივე მხრიდან შეწვით.
სალათის ფურცლები, კიტრი, ხახვი, სტაფილო, მწვანე და წითელი ბულგარული წიწაკა საშუალო ზომაზე დაჭერით და ცალკე ჯამში მოათავსეთ. ამ ბოსტნეულს დაუმატეთ შუაზე გაჭრილი პომიდორი ჩერი, გახეხილი ყველი და მოასხით 2 სუფრის კოვზი სპეციალურად მომზადებული სოუსი.
კარგად მოურიეთ და მიღებული მასა გადაიტანეთ ოდნავ მოზრდილ თეფშზე.
გვერდებზე მოუწყვეთ შემწვარი ფილე.
ბოლოს ზემოდან მოაყარეთ მსხვილად გახეხილი შებოლილი ყველი.
შენიშვნა:
იმისთვის, რომ შემწვარი ფილე მაგარი და უხეში არ იყოს, შეწვამდე ამოავლეთ თეთრ ღვინოში ან თეთრი ღვინო ფილეს შეწვის პროცესში, პირდაპირ ტაფაზე მოასხით; თეთრ ღვინოში შემწვარი ფილე უფრო რბილი და წვნიანი გახდება.
სალათის მოსამზადებლად ხახვი აუცილებლად წვრილად დაჭერით. შეგიძლიათ, ჩვეულებრივი ხახვი მწვანე ხახვით ჩაანაცვლოთ;
სპეციალური სოუსი, შეგიძლიათ უფრო მეტი რაოდენობით მოამზადოთ, შეინახოთ მაცივარში და არა მხოლოდ ქათმის სალათზე მოსასხმელად, არამედ სხვა სალათებისთვისაც გამოიყენოთ.
არ დაგავიწყდეთ, რომ მარილი შემწვარ ფილესაც აქვს. სულგუნი და შებოლილი ყველიც მარილიანია. ამიტომ, კერძი მარილის დამატებას აღარ საჭიროებს.
თუ გსურთ, რომ ამგვარად მომზადებული სალათი თქვენს სადღესასწაულო სუფრას ამშვენებდეს, ან, უბრალოდ, სადილზე ოჯახის წევრებისთვის მოამზადოთ, ამისთვის გაზარდეთ ინგრედიენტების რაოდენობა, დააქუცმაცეთ წვრილად ქათმის ფილე და კერძი, ჩვეულებრივ, სასალათეში გადაიტანეთ.
ფოტოგრაფი: ნინუცა მანდარია