მთლიანობაში ტორტისთვის საჭირო პროდუქტი:
კვერცხი - 5 ცალი
შაქარი - 5 სუფრის კოვზი
გამაფხვიერებელი - 18-გრამიანი შეკვრა ან ჩაის კოვზის მეოთხედი სოდა
ფქვილი - 3 სუფრის კოვზი
კაკაო - 4 სუფრის კოვზი
35%-იანი ნაღები „პრეზიდენტი“ - 1 ლიტრი
შაქრის პუდრა - 5 სუფრის კოვზი
კონიაკი - 100 გრ
ტკბილი შავი ჩაი - 1 ჩაის ჭიქა
შავი შოკოლადი - 3 ფილა
პასტერიზებული რძე - 80 გრ.
აქედან
ბისკვიტისთვის საჭიროა:
კვერცხი - 5 ცალი
შაქარი - 5 სუფრის კოვზი
გამაფხვიერებელი - 18-გრამიანი შეკვრა ან ჩაის კოვზის მეოთხედი სოდა
ფქვილი - 3 სუფრის კოვზი
კაკაო - 2 სუფრის კოვზი
კვერცხები და შაქარი მიქსერით კარგად ათქვიფეთ და დაუმატეთ გამაფხვიერებელი (თუ გამაფხვიერებელი ვერ მოიძიეთ, სოდაც გამოგადგებათ).
ცოტა ხანს კიდევ თქვიფეთ და მიქსერი გამორთეთ.
ათქვეფილ მასას ნელ-ნელა დაუმატეთ გაცრილი ფქვილი, კაკაო და ხის კოვზით კარგად მოურიეთ - ერთგვაროვანი კონსისტენციის ცომი უნდა მიიღოთ.
მზა ცომი ჩაასხით ცხიმწასმულ ყალიბში და 180 გრადუსზე 15-20 წუთის განმავლობაში გამოაცხვეთ.
სანამ ტორტი ცხვება, გაამზადეთ კრემი და დასანამი სიროფი.
კრემისთვის საჭიროა:
35%-იანი ნაღები „პრეზიდენტი“ - 1 ლიტრი
შაქრის პუდრა - 5 სუფრის კოვზი
კაკაო - 2 სუფრის კოვზი
ნაღები მიქსერით კარგად ათქვიფეთ.
როცა აფუმფულდება და კრემის კონსისტენციის გახდება, მიქსერი გამორთეთ და ხის კოვზის დახმარებით შეურიეთ შაქრის პუდრა.
შემდეგ ამ მოცულობის კრემი ორ თანაბარ ნაწილად გაყავით და მეორე ნაწილს 2 კოვზი კაკაო დაუმატეთ.
დასანამი სიროფისთვის საჭიროა:
კონიაკი - 100 გრ
ტკბილი შავი ჩაი - 1 ჩაის ჭიქა
თბილ ჩაიში ჩაასხით კონიაკი და გააგრილეთ.
ტორტის აწყობა:
გამომცხვარი და გაგრილებული ბისკვიტი გაჭერით შუაზე და დანამეთ.
ტორტის პირველ ფენას წაუსვით კრემი, დააფარეთ მეორე ფენა და წაუსვით დარჩენილი კრემი, რომელსაც კაკაო აქვს დამატებული.
ტორტისთვის საბოლოო სახის მისაცემად, ერთი ფილა შავი შოკოლადი გახეხეთ სახეხზე და მოაფრქვიეთ ტორტს თავსა და გვერდებზე.
დარჩენილი ორი ფილა შოკოლადი დატეხეთ, ჩაყარეთ ჯამში, დაასხით 80 გრ. პასტერიზებული რძე, ორთქლის აბაზანაზე გაადნეთ და მოასხით გამზადებულ ტორტს.
გემრიელად მიირთვით!