ამჯერად ორაგულის ჩაშუშულს გავაკეთებთ, რომლის რეცეპტს რესტორან „შატროს“ გამოცდილი მზარეული დავით გიორგბერიძე გვთავაზობს.
ორაგულის ჩაშუშულის მოსამზადებლად საჭიროა:
ორაგულის ფილე - 1 კგ.
ხახვი - 2 ცალი;
პომიდორი - 0,5 კგ;
ტომატი - 1 ს/კ;
ზეთი - 100 გრ;
ქინძი - 100 გრ;
მჟავე კიტრი - 100 გრ;
ნიორი - 5-6 კბილი;
მწვანე წიწაკა - 1 ცალი;
მარილი, პილპილი - გემოვნებით.
მომზადების წესი:
კუბიკებად დაჭრილი ფილე მობრაწეთ ზეთიან ტაფაზე, ისე, რომ თევზი არ დაიშალოს.
ცალკე ტაფაზე მოშუშეთ ხახვი, დაამატეთ 1 სუფრის კოვზი ტომატი და კანგაცლილი პომიდორი.
ხახვის მოშუშვის პარალელურად, წვრილად დაჭერით ქინძი, მჟავე კიტრი, ნიორი, მწვანე წიწაკა და ეს ყველაფერი ჩაამატეთ ხახვიან ტაფაში.
დაახლოებით, 5-7 წუთის შემდეგ, დაამატეთ ცოტა წყალი, ისე რომ საშუალო სისქის სოუსი მიიღოთ.
როგორც კი შეამჩნევთ, რომ ინგრედიენტები კარგად ჩაიშუშა, დაამატეთ შემწვარი თევზის ფილე, ოდნავ მარილი, პილპილი და კიდევ ერთხელ წამოადუღეთ.
თევზის უგემრიელესი ჩაშუშული მზად არის!
შენიშვნა:
თევზის ფილეს მოსაბრაწად, მაქსიმუმ, 15 წუთია საჭირო.
ეცადეთ, ფილე არ ჩაიშალოს;
იმისთვის, რომ პომიდორს კანი მარტივად გააცალოთ, ჩადეთ ადუღებულ წყალში;
როგორც ნახეთ, ორაგულის ჩაშუშულს მწვანე წიწაკაც სჭირდება და პილპილიც. ეცადეთ, კერძი ძალიან ცხარე არ გამოგივიდეთ.
თევზის ჩაშუშულის მოსამზადებლად, 20-25 წუთი საკმარისია.
გემრიელად მიირთვით!
ფოტოგრაფი: ნინუცა მანდარია