კლასიკური რიზოტოს რეცეპტს რესტორან „შატროს“ ევროპული სამზარეულოს გამოცდილი მზარეული ალექსანდრე კოშკელოვი გვიზიარებს.
რიზოტოს მოსამზადებლად საჭიროა:
ბრინჯი, მრგვალი, ყვითელი - 100 გრ.
თეთრი ღვინო - 100 გრ.
ქამა სოკო - 60 გრ.
პარმეზანი - 30 გრ.
ხახვი - 1 თავი
კარაქი - 30 გრ;
ყვითელი ყვავილი - 1 გრ;
მარილი და პილპილი - გემოვნებით.
მომზადების წესი:
დადგით ბრინჯი გაზქურაზე მოსახარშად.
ბრინჯის მოხარშვამდე წვრილად დაჭრილი ხახვი მოთუშეთ ზეთში, დაამატეთ დაჭრილი ქამა სოკო და მოასხით თეთრი ღვინო.
მიღებულ მასას დაამატეთ მოხარშული ბრინჯი, ყვითელი ყვავილი და ადუღეთ დაბალ ცეცხლზე, თან მუდმივად ურიეთ ხის კოვზით.
ბოლოს კი, მოაყარეთ გახეხილი პარმეზანი, მარილი, პილპილი და დაუმატეთ კარაქი. ეს კერძს კრემოვან სტრუქტურას შესძენს.
დაახლოებით, 2 წუთის შემდეგ გაზქურა გამორთეთ.
აბა, გასინჯეთ, გემრიელია?
შენიშვნა:
რიზოტოს სპეციალური ბრინჯით ამზადებენ, რომელსაც არბორიო ეწოდება. მისი შეძენა შესაძლებელია ნებისმიერ სუპერმარკეტში.
როდესაც ცალკე ქვაბში ბრინჯს მოხარშავთ, ეცადეთ, ძალიან არ გადახარშოთ. უმჯობესია, თუკი ბრინჯს სრულ მოხარშვამდე 5 წუთით ადრე გადაიტანთ ტაფაზე.
როგორც კი შეამჩნევთ, რომ ტაფაში ბრინჯი ჩაიხარშა, დაუმატეთ ცოტა წყალი.
რიზოტოს მომზადებისას მუდმივად უნდა ურიოთ.
ნუ დატოვებთ კერძს უმეთვალყურეოდ!
რიზოტოს მომზადებას, დაახლოებით, 30 წუთი სჭირდება.
გემრიელად მიირთვით!
ფოტოგრაფი: ნინუცა მანდარია