ქათმის გულ-ღვიძლი კეცზე - წვნიანი და არომატული კერძი

კეცზე მომზადებული ქათმის გულ-ღვიძლის რეცეპტს რესტორან „შატროს“ გამოცდილი მზარეული დავით გიორგბერიძე გვიზიარებს.

ქათმის გულ-ღვიძლის მოსამზადებლად საჭიროა:
ქათმის გულ-ღვიძლი - 300 გრ;
ხახვი - 100 გრ;
ნიორი - 3-4 კბილი;
წიწაკა - 50 გრ;
კარაქი - 50 გრ;
ქონდარი - გემოვნებით;
წითელი წიწაკა - გემოვნებით;
მარილი - გემოვნებით.

მომზადების წესი:
ქათმის გულ-ღვიძლი კარგად გარეცხეთ. დაჭერით შუაზე და გადაიტანეთ კარგად გაცხელებულ ზეთმოსხმულ კეცზე.
პერიოდულად მოურიეთ და კარგად მოთუშეთ.
სანამ კეცზე წყალი ბოლომდე ამოშრება, დაამატეთ კარაქი, მოაყარეთ ალყა-ალყად დაჭრილი ხახვი და, ქათმის გულ-ღვიძლთან ერთად, კარგად მობრაწეთ. შემდეგ დაამატეთ დაჭყლეტილი ნიორი, მოაყარეთ ქონდარი, ქინძი და მარილი. კიდევ 5 წუთით გააჩერეთ ღუმელში.
როგორც კი შენიშნავთ, რომ კერძი ზედა მხრიდანაც კარგად დაიბრაწა, კეცი ღუმელიდან გამოიღეთ.  

შენიშვნა:
ქათმის გულ-ღვიძლი იგივე მეთოდით შეგიძლიათ, ტაფაზეც მოამზადოთ.
ასევე, შეგიძლიათ, ჯერ ტაფაზე მოამზადოთ ქათმის გულ-ღვიძლი და სუფრაზე მიტანამდე, გაცხელებულ კეცზე გადაიტანოთ.
გამზადებულ ქათმის გულ-ღვიძლს ძალიან უხდება ზემოდან მოყრილი ალყა-ალყად დაჭრილი უმი ხახვი.

გემრიელად მიირთვით!