გემრიელი „კარტოფილები“ თხილითა და შოკოლადით

კულინარია

20 ნოემბერი 12:00, 2016 წელი
64

ეს უგემრიელესი დესერტი მშვენიერი მაგალითია იმისა, რომ ყველაფერი გენიალური მარტივია. რესტორან „საამოს“ (ხეივინის შესახვევი #2) გამოცდილი შეფ-მზარეული ლევან თებიძე ექსკლუზიურად „Funtime“-თვის სწრაფად და მარტივად მოსამზადებელი უგემრიელესი „კარტოფილების“ რეცეპტს გვთავაზობს.

ამ ნუგბარის მოსამზადებლად დაგჭირდებათ:
კვერცხი - 5 ცალი
მაწონი -1 ქილა
მარგარინი - 200 გრ.
შაქარი - 2,5 ჩ/ჭ.
კაკაო - 1 ჩ/ჭ.
ფქვილი - 3 ჩ/ჭ.
სოდა - 1 ჩ/კ.
მწიკვი ვანილი,
შესქელებული რძე - 2 ქილა
ნიგოზი ან თხილი - გემოვნებით
კონიაკი - 30 გრ.

მომზადების წესი:
1-ლი მოქმედება:

კვერცხი და შაქარი მიქსერით ათქვიფეთ.
კარგად რომ აფუმფულდება და მოცულობაში მოიმატებს, დაუმატეთ მაწონში არეული სოდა და თქვეფა გააგრძელეთ.
ცალკე ჯამში გაადნეთ მარგარინი და ათქვეფილ კვერცხს დაუმატეთ.
ყველაზე ბოლოს დაუმატეთ ერთმანეთში არეული ფქვილი, კაკაო და ვანილი და კარგად აურიეთ.
ცომი ცხიმწასმულ ფორმაზე დაასხით და 180 გრადუსზე, 20-25 წუთის განმავლობაში აცხვეთ.

მე-2 მოქმედება:
გამომცხვარი და გაცივებული ბისკვიტი კარგად დაფშვენით.
დაუმატეთ შესქელებული რძე, სურვილისამებრ, თხილი ან ნიგოზი და კონიაკი. ყველაფერი კარგად აზილეთ, ერთგვაროვანი მასის მიღებამდე.
გააკეთეთ კარტოფილის ფორმის ბურთულები და ქოქოსის ფანტელში, გახეხილ შოკოლადში ან კაკაოში ამოავლეთ.

შენიშვნა:
მზა „კარტოფილები“ სასურველია, ცოტა ხნით მაცივარში მოათავსოთ.

გემრიელად მიირთვით!