ცომის შემადგენლობა:
კვერცხი - 2 ცალი,
შაქარი - 600 გრ.
რძე - 500 გრ.
მარგარინი „ონა“ -125 გრ.
საფუარი - 50 გრ.
ზეთი -30 გრ.
ფქვილი - 1,600 კგ.
ქიშმიში -100 გრ.
ვანილი - დანის წვერით.
სიროფის შემადგენლობა:
შაქარი - 1 ჭიქა,
წყალი - 1 ჭიქა.
მოქმედება 1:
ჯამში ჩაყარეთ 1 სუფრის კოვზი ფქვილი, 1 სუფრის კოვზი საფუარი და 1 სუფრის კოვზი შაქარი.
დაასხით 1 ჭიქა თბილი წყალი, კარგად აზილეთ და თბილ ადგილას დადგით. (ეს ინგრედიენტები ზემოთ ჩამოთვლილებში არ შედის).
მოქმედება 2:
რძეში გაადნეთ მარგარინი ისე, რომ ძალიან არ გაცხელდეს.
ცალკე ჯამში, კვერცხით და შაქრით გააკეთეთ გოგლიმოგლი, დაუმატეთ რძეში გამდნარი მარგარინი, ვანილი და პირველ ჯამში ამოსული საფუარიანი მასა.
ეს ყველაფერი კარგად ათქვიფეთ (მიქსერის შემთხვევაში, დაბალ სიჩქარეზე), ნელ-ნელა დაუმატეთ ფქვილი და მოზილეთ ცომი.
სულ ბოლოს დაუმატეთ ქიშმიში, ზეთი და ცომი სითბოში დააყოვნეთ.
მოქმედება 3:
ცომი რომ ამოვა, ზეთში დასველებული ხელით ჩაზილეთ და კიდევ დააყოვნეთ. მეორედ ამოსვლის შემდეგ, ცომიდან თქვენთვის სასურველი ზომისა და ფორმის გუნდები ამოჭერით და ფქვილმოყრილ დაფაზე დააწყვეთ.
მოქმედება 4:
ცომის გუნდებს თქვენთვის სასურველი ფორმა მიეცით და თუნუქის ფურცელზე გადაიტანეთ.
სილიკონის ფუნჯით გადაუსვით წყალში ან რძეში ათქვეფილი კვერცხის გული და ცოტა ხანს კიდევ დააყოვნეთ.
კარგად რომ აფუმფულდება, 180 გრადუსზე გაცხელებულ ღუმელში შედგით და 10-15 წუთის განმავლობაში გამოაცხვეთ.
მოქმედება 5:
სიროფის მოსამზადებლად შაქარი და წყალი ხუთი წუთი ადუღეთ და ცეცხლიდან გადმოდგით.
მოქმედება 6:
ფუნთუშები კარგად რომ დაიბრაწება, ღუმელიდან გამოიღეთ და წინასწარ მომზადებული სიროფი წაუსვით.
გემრიელად მიირთვით!