„ნიჭიერის“ გერმანელი მონაწილე ქართველების სილამაზემ აღაფრთოვანა

ნიჭიერი

24 დეკემბერი 12:00, 2015 წელი
135

მაგიურმა ნომერმა, რომელიც კელვინ კალვუსმა ბურთებით შეასრულა, მაყურებლის დიდი მოწონება დაიმსახურა. საქართველოში გერმანიიდან ჩამოვიდა. მართალია, ფინალში ვერ გადავიდა, მაგრამ მაინც კმაყოფილია, ამბობს, რომ საქართველომ და ქართველმა ხალხმა მასზე დიდი შთაბეჭდილება მოახდინა.


- როდის აღმოაჩინეთ ეს ნიჭი საკუთარ თავში?
- 8 წლის წინათ აღმოვაჩინე, რომ ამის გაკეთება შემეძლო და ვარჯიში დავიწყე. თავიდან, რა თქმა უნდა, არც ისე კარგად გამომდიოდა, მაგრამ არ ვნებდებოდი და ბურთებთან თამაშს ნელ-ნელა უფრო და უფრო ვხვეწდი.


- ზუსტად რა ჰქვია იმას, რასაც აკეთებთ?
- კონტაქტური ჟონგლიორობა - ეს ჩემი პროფესიაა. მე არტისტი ვარ.


- ამ ნომრით სხვა კონკურსებში თუ მიგიღიათ მონაწილეობა?
- დიახ, ხშირად გამოვდივარ სხვადასხვა შოუში გერმანიაში.


- შეგიძლიათ, თქვენი ოჯახის შესახებ გვესაუბროთ?
- მე და ჩემი  მეუღლე უკვე დიდი ხანია, ერთად ვართ. სამი არაჩვეულებრივი შვილი გვყავს. ჩემი ცოლი ყოველთვის ჩემ გვერდით არის და ძალიან  მეხმარება ყველაფერში. ვცდილობ, ყველაზე დიდი დრო ჩემს ოჯახთან გავატარო.


- ყველაზე მეტად რა მოგეწონათ საქართველოში?
- რა თქმა უნდა, ხალხი!  როდესაც მოვდიოდი, ჩემი მეგობრები მესაუბრებოდნენ ამ ქვეყნის შესახებ, მეუბნებოდნენ, რომ საქართველოში ძალიან ლამაზი ხალხი ცხოვრობს. რომ ჩამოვედი, ამაში მართლაც დავრწმუნდი.


- სცენაზე შეგამჩნიეთ, რომ ქართულ ფოლკლორულ მუსიკას მოძრაობებით აყევით...
- ქართული ტრადიციული მუსიკა არაჩვეულებრივია. არის საბრძოლო, თან იუმორისტული, ყველაფერს მოიცავს.


- რომელიმე ქართული სიტყვა ხომ არ ისწავლეთ?
- „მადლობა“ და „გამარჯობა“ - ჯერჯერობით მხოლოდ ამ ორი სიტყვის სწავლა მოვახერხე.