ანსამბლი „იამე“ - მგონი, სამივეს გვეშინია ერთმანეთის

ნიჭიერი

12 იანვარი 14:00, 2016 წელი
36

ქალთა ფოლკლორული ანსამბლი იმერეთიდან „იამე“ ბოლო ნახევარფინალში ხალხის რჩეული გახდა. ახლა ფინალში სამი ფოლკლორული ანსამბლი და სამჯერ მეტი კონკურენციაა.  


გულთამზე კუბლაშვილი, ანსამბლ „იამეს"  ხელმძღვანელი:
- თერჯოლის ქალთა ანსამბლი „იამე“ 2012  წელს ჩამოყალიბდა. ანსამბლში ექვსი წევრი ვართ. ყველაზე უხუცესი 80 წლისაა - ქალბატონი ალექსანდრა გულაბანიძე, ყველაზე ახალგაზრდა კი 18 წლის ანა დევიძეა.


- „ნიჭიერში“ მონაწილეობა რატომ გადაწყვიტეთ?
- მონაწილეობა მივიღეთ „რუსთავი 2“-ის ტელეგადაცემა „სხვა შუადღეში“, საიდანაც მთელმა საქართველომ გაგვიცნო. აქედან წამოვიდა იდეა, რომ „ნიჭიერშიც“ მიგვეღო მონაწილეობა, გიორგი უშიკიშვილმა გვირჩია. ისე მოხდა, რომ ჯერ ნახევარფინალში გადავედით, ახლა კი ფინალში ვართ.

- ელოდებოდით ფინალში მოხვედრას? როგორი იყო თქვენი ემოციები?
- ძალიან ვღელავდით. თავიდან არ მინდოდა მონაწილეობა, მაგრამ ახლა უკვე ინტერესიც გაგვიჩნდა, მოვიგოთ და ხალხის იმედები გავამართლოთ. გამიხარდა, რომ სწორედ ხალხმა გადაგვიყვანა. მინდა, დიდი მადლობა ვუთხრა ყველას, მთელ საქართველოს, ვინც მხარი დაგვიჭირა.

- ფინალში სამი ფოლკლორული ანსამბლია. ბუნებრივია, კონკურენცია დიდი იქნება...
- მგონი, სამივეს გვეშინია ერთმანეთის (იცინის). ჩვენ სხვა სტილს ანსამბლი  ვართ. მართალია, ფოლკლორული სიმღერებიც გვაქვს, მაგრამ ჩვენს რეპერტუარში ქალაქური სიმღერები სჭარბობს.

- ოჯახის წევრები როგორ შეხვდნენ თქვენს გამოსვლას?
- ჩემი ოჯახის წევრები საოცრად ღელავდნენ. მუსიკალური ოჯახი მაქვს. მამა ოპერის მომღერალი იყო. ოთხი შვილი ვყავართ და ოთხივეს კონსერვატორია გვაქვს დამთავრებული.

- ფინალში რას იმღერებთ?
- გვინდა, იმერული სიმღერების პოპური შევასრულოთ. ვფიქრობ, ეს უფრო საინტერესო იქნება ჩვენგან.