- თქვენი და ნიკა გვარამიას დუეტით მაყურებელმა ძალიან ისიამოვნა...
- კომპლიმენტისთვის დიდი მადლობა. ბავშვობიდან მიყვარს სიმღერა და ექსპერიმენტების პერიოდიც მქონდა. მერე იყო „ელექტროტალღები“, „მე დღეს შენთან მოვალ“, რომლებზეც კლიპებიც მაქვს და ელექტრომუსიკის მოყვარულებს ძალიან მოსწონდათ. ქუჩაშიც კი მაჩერებდნენ, თქვენ ის არ ხართო, მეკითხებოდნენ და ჩემს სიმღერებს იხსენებდნენ. ეს მრავალი წლის წინათ იყო. პერიოდულად ამოვიმღერებ ხოლმე და ნიკა გვარამიამაც მშვენივრად შეძლო, რომ ორ ხმაში გვემღერა. ეს ყველაფერი სპონტანურად მოხდა.
- მეგობრების გარემოცვაში თუ გიწევთ სიმღერა?
- კი, რა თქმა უნდა. როცა მღერიან, მეც ავმღერდები ხოლმე.
- „ნიჭიერის“ ბოლო შესარჩევი ტურები გაიმართა. როგორია თქვენი პროგნოზი?
- საინტერესო და ფერადი „ნიჭიერი“ გველოდება. პროექტის გულშემატკივრები ბევრ ნიჭიერ ნომერსა და მომღერალს ნახავენ.
ბოლო შესარჩევ ტურშიც მრავლად იყვნენ უცხოელები. ამერიკელი მონაწილის შესრულებამ ჟიურის წევრები განსაკუთრებით მოხიბლა. ნიკა გვარამია სცენაზეც აიჭრა, ვანიკოს მოუხმო და სამივემ სიმღერით სცადა მაყურებლის გახალისება, რაც უდავოდ კარგად გამოუვიდათ. ნიკამ მონაწილე მომდევნო ტურში ერთი პირობით გადაიყვანა - ამერიკელი კონკურსანტი ქართულად ამღერდება.