რატომ ეშინოდა ცხოველების „ვეტ-ჰაუსის“ მარკეტინგის მენეჯერს?

PR კლუბი

29 თებერვალი 16:00, 2016 წელი
50

ანი ზარნაძე „ვეტ-ჰაუსის“ მარკეტინგის მენეჯერია. ბავშვობაში ცხოველების მიმართ შიში ჰქონდა, თუმცა სამსახურმა ეს ყველაფერი დააძლევინა და დღეს ვეტერინარულ ჰოსპიტალში სიამოვნებით მუშაობს.


განსხვავებული სფერო
დავამთავრე შავი ზღვის საერთაშორისო უნივერსიტეტი, ბიზნესის ადმინისტრირების ფაკულტეტი. 
2010 წლიდან სტაჟირება დავიწყე სოფლის მეურნეობის კორპორაციაში, მარკეტინგის დეპარტამენტში, სადაც 2012 წლამდე ვიმუშავე. ამის შემდეგ რამდენიმე განსხვავებული სამსახური გამოვიცვალე. 
დღეს „ვეტ-ჰაუსის“ მარკეტინგის მენეჯერი ვარ. ეს არის აბსოლუტურად განსხვავებული სფერო. ვეტერინარიასთან არანაირი შეხება არ მქონია. მართალია, პატრაობისას ბაჭიები და თუთიყუშები მყავდა, მაგრამ ბავშვობაში მომხდარი ინციდენტის გამო, რაც ქუჩის ძაღლებს უკავშირდება, ძაღლების ყოველთვის მეშინოდა.
აქ რომ დავიწყე მუშაობა, ეს შიში გამიქრა. ამაში, „ლეგი“ დამეხმარა, ჩვენი ჰოსპიტალის სახე, ამერიკული აკიტა. ყოველდღიურად ერთ ოთახში გვიწევს ყოფნა და ერთმანეთს ძალიან შევეჩვიეთ.


გასაუბრება სკაიპით
აქ მუშაობა საკმაოდ უცნაურად დავიწყე. რაჭაში ვისვენებდი, როდესაც ინტერნეტში განცხადება ვნახე და რეზიუმე გამოვაგზავნე. იმავე დღეს დამფუძნებელი დამიკავშირდა და გასაუბრება Skype-ით გავიარე. მეორე დღესვე შემომთავაზა სამსახური.ჩემი სამუშაო დღე 10:00 საათზე იწყება. ჯერ ელექტრონულ ფოსტას ვამოწმებ და მერე ჰოსპიტალის ოფიალურ, Facebook-ის გვერდზე ვინაცვლებ. ყოველთვის იგეგმება ახალი აქციები, ასევე, დღის განმავლობაში მომხმარებელთან ურთიერთობაც მიწევს. თითოეულ მათგანთან განსაკუთრებული მიდგომა გვაქვს, ვცდილობთ, რომ ჩვენი მომსახურებით  ყველა მომხმარებელი კმაყოფილი დარჩეს.
კარგი მენეჯერი მაქსიმალურად მობილიზებული უნდა იყოს და პასუხისმგებლობის გრძნობა ჰქონდეს. მთავარია კარგად გააცნობიერო ის მიზანი, რისთვისაც ყოველდღიურად საქმიანობ.  მარკეტინგის სფეროში მუდმივად ცვლილებებია, ამიტომ მნიშვნელოვანია, რომ ყოველთვის მიჰყვე მის ტენდენციებს.


მძიმე მდგომარეობაში მყოფი ცხოველები გადაგვირჩენია
„ვეტ-ჰაუსი“ ამიერკავკასიაში ერთ-ერთი ყველაზე თანამედროვე, ევროპული სტანდარტების მქონე ვეტერინარული დიაგნოსტიკური ჰოსპიტალია, სადაც ცხოველებისთვის განკუთვნილი თითქმის ყველა მომსახურება გვაქვს. გვყავს უკრაინიდან სპეციალურად მოწვეული მთავარი ვეტერინარი და ქირურგი,რომლებსაც ვეტერინარიის სფეროში 20 წლიანი გამოცდილება აქვთ.
ჰოსპიტალის გახსნის დღიდან, უკვე გვყავდა საკმაოდ მძიმე მდგომარეობაში მყოფი პაციენტები. საბედნიეროდ შევძელით მათი გადარჩენა.  ახლა ჩვეულებრივად და რაც მთავარია ჯანმრთელად აგრძელებენ ცხოვრებას.
„ვეტ ჰაუსი“-დან გამომდინარე, სურვილი გამიჩნდა, სახლშიც მყავდეს ცხოველი და იმედია, ძალიან მალე მეყოლება კიდეც.