დღის დედოფალია 19 წლის ანუკა შანიძე, პედაგოგიური ფაკულტეტის სტუდენტი.
სიძე - 22 წლის შოთიკო გრიგოლავა, ბიზნესის ფაკულტეტის სტუდენტი.
ერთმანეთი მეგობარმა გააცნოთ. შარშან, 23 ნოემბერს, ანუკა მეგობრებთან ერთად გიორგობის აღსანიშნად იყო. გვერდით სუფრაზე შოთიკო და ანუკას რამდენიმე ძალიან ახლო მეგობარი ერთად ისხდნენ. მათ მაგიდასთან სულ რამდენიმე წუთით მივიდა ანუკა და შოთიკოც მაშინ გაიცნო.
რამდენიმე დღის შემდეგ გოგომ ბიჭისგან შეტყობინება მიიღო, შემდეგ - ვარდებიც. თითქოს ამ ყველაფერს ბიჭი მეგობრულად აკეთებდა, მაგრამ მალევე მიხვდა, რომ გრძნობების დამალვას აზრი არ ჰქონდა და...
ზუსტად 6 თვეში დაოჯახდნენ, მოულოდნელად და დაუგეგმავად. მანამდე დაოჯახებაზე არც კი უსაუბრიათ... ერთხელ შოთიკოს მეგობართან იყვნენ სახლში და იქიდან სპონტანურად გადაწყვიტეს ბათუმში წასვლა.