ნუ გაჩერდებით გზაში - მოამზადეთ ავტომობილი ზამთრისთვის!

რჩევები ავტომოყვარულებს
28.10.2016 22:00
638

თუკი თქვენმა ავტომობილმა ზაფხულის სეზონზე უპრობლემოდ გატარათ, ეს სულაც არ ნიშნავს იმას, რომ ზამთარშიც გამართულად იმუშავებს და ყველაზე ცუდ მომენტში არ გიმტყუნებთ. მოდით, მოვუსმინოთ, რას გვირჩევენ სპეციალისტები - როგორ მოვამზადოთ მანქანა ცივი ამინდებისთვის?

დღეს ამ თემაზე გვესაუბრება „თეგეტა მოტორსის“ სერვისების განვითარების დეპარტამენტის უფროსი  ლაშა ნარუსაშვილი.


1. უნდა დავიწყოთ გაგრილების სითხის - ანტიფრიზის მდგომარეობის შემოწმებით


უნდა დადგინდეს რამდენგრადუსიან ყინვას უძლებს ანტიფრიზი, რომელიც ავტომობილში ასხია. თუკი გაგრილების სითხეს დაკარგული აქვს თვისებები, ის შეიძლება ყინვის დროს გაიყინოს და ძრავი დააზიანოს. ამიტომ  მძღოლებმა ყურადღებით უნდა შეამოწმებინონ გაგრილების სითხე და საჭიროების შემთხვევაში აუცილებლად გამოცვალონ.


2. უნდა გადაამოწმოთ აკუმულატორის მდგომარეობა



მანქანის აკუმულატორის მოქმედების ვადა, საშუალოდ, 3-5 წელია. თუ ეს ვადა ამოწურული გაქვთ, უმჯობესია, ახალი შეიძინოთ. ამისთვის გაითვალისწინეთ თქვენი ავტომწარმოებლის რჩევა, რომელ ჯგუფს ანიჭებენ უპირატესობას, შეამოწმეთ დამზადების თარიღი და იკითხეთ, აქვს თუ არა გარანტია.
მაგრამ, თუ აკუმულატორი შედარებით ახალი შეძენილი გაქვთ, ყინვების დადგომამდე აუცილებლად გადაამოწმეთ, არის თუ არა ყველაფერი წესრიგში, ვინაიდან ზამთარში აკუმულატორზე დატვირთვა იზრდება. სპეციალურ სერვისცენტრებში არსებობს ხელსაწყოები, რომლის დახმარებითაც მარტივად შეიძლება დიაგნოზის დასმა. 


3. უსაფრთხოებისთვის ზამთარში ყველაზე მნიშვნელოვანი, რა თქმა უნდა, საბურავებია


ზაფხულისა და ზამთრის საბურავებს შორის დიდი სხვაობაა. შესაძლოა, მძღოლმა იფიქროს, რომ მისი ზაფხულის საბურავის პროტექტორი კარგ მდგომარეობაშია და ზამთარსაც ამით გადააგორებს, მაგრამ ყველამ უნდა გაითვალისწინოს, რომ ზამთარში ზაფხულის საბურავების გამოყენება სახიფათოა. ზაფხულის საბურავში ნაკლებია რეზინის შემცველობა. შესაბამისად, ის უფრო ხისტია, ზამთარში კი კიდევ უფრო უხეშდება. ასეთი საბურავი უფრო მეტად ცურავს და უჭირს დამუხრუჭება. ზამთრის საბურავებში კი რეზინის შემცველობა მაღალია, რის გამოც ის უფრო რბილია და უკეთესად ეჭიდება თოვლიან და მოყინულ ზედაპირს.
ასე რომ, როდესაც გარემოს ტემპერატურა +7 გრადუსს ჩამოცდება, აუცილებლად უნდა დავაყენოთ ზამთრის საბურავი.

4. ზამთრისთვის ავტომობილში აუცილებელია საქარე მინის საწმენდი ყინვაგამძლე სითხე


ყინვაგამძლე სითხე არამარტო წმენდს საქარე მინას, არამდე უზრუნველყოფს, რომ ბაკში წყალი არ გაიყინოს. ყველა მძღოლმა იცის, როგორ საგრძნობლად ამცირებს საქარე მინაზე ჭუჭყი მხედველობის არეს და როგორ გვიშლის ხელს ავტომობილის უსაფრთხოდ მართვაში.

 

დაბოლოს: უსაფრთხოების მიზნით ზამთარში უმჯობესია, ავტომობილით ვიმოძრაოთ ჩვეულზე უფრო დაბალი სიჩქარით, გავზარდოთ დისტანცია ავტომობილებს შორის და ნელა ვამუხრუჭოთ. 

ავტორი: სალომე ჩაჩიბაია